رد: افيدوني الذكر خامل ووجود ورم

[Besa]

السلام عليكم

تغيير المشربيات والمأكليات للمقفلة
عشان فضلات الطيور الله يكرمك وكمان عشان الحشرات
لازم لمن نقدم شيء لطيورنا نكون متأكدين إنو نظيف وحيبقى نظيف لين يستهلك
وكدا نبعد طيورنا عن الأمراض ونشجع البادجي على التزاوج والتفريخ
لمن يحصل أكل وموية نظيفة ونظافة وهدوء هنا وفرنا الجو المناسب لطيورنا
بخصوص البياضة تركيبها من برا لأسباب
أول شيء مانزاحم على الطيور بأخد مساحة من القفص
تاني شيء لمن تكون داخل القفص ياماحنقدر نوصل للبياضة ونفتحها بسهولة
أو حنوصلها بعد خوف وقلق الطيور ودا الشيء مرفوض في مرحلة الحضن والتفريخ
وبالتالي لمن تكون برا حيكون سهل علينا مراقبة البيض والفروخ ومتابعتهم
تالت شيء تنظيف البياضة حيكون أسهل
بفتح بوابة البياضة وجرف الأوساخ والفضلات ونقفل البوابة وخلاص وبدون مانزعج الطيور
نيجي لسؤالك عن القلش مرحلة طبيعية يمر فيها البادجي يستبدل فيها الريش القديم بريش جديد
نشوف وقتها ريش متناثر ودا شيء طبيعي في حالة لقينا زي الدبابيس في رأس وجسم الطائر
ودا هوا الريش الجديد يكون طالع
وحبيت أوضح عشان سقوط الريش ممكن يكون مرض أو من شجار بين الطيور
بخصوص جهوزية الأنثى والدكر
الدكور تكون جاهزة دائماً بعكس الإناث ساعات تكون في مرحلة الجهوزية للتزاوج والتفريخ
وساعات تطلع من مرحلة الجهوزية ودا الشيء نعرفوا من كير الأنثى
الأنثى الجاهزة يكون لون الكير فيها بني أما لوأبيض أو أبيض مشوب بأزرق دي غير جاهزة
طبعاً مافي شيء ثابت بس هدا الغالب والحيوانات بشكل عام مافينا نتعامل معاها 1+1=2
بس يبقى الأكل المتنوع والفيتامينات دي أسباب تسرع من عملية الجهوزية
والتوالف سهل لأن الطيور بطبيعتها إجتماعية وبسرعة تداخل مع بعض
أهم شيء توفير الجو المريح للطيور
نيجي لنفشة الريش السبب البرد لازم تدفيهم كويسسس
لأن البرد لوتمكن من الطائر مرضو ودا الشيء مانبغاه
والحمدلله الفضلات طبيعية ماشوف شيء يخوف
بس أعطي طيورك خلطة التوم والليمون ونتابع الدكر يتحسن أو لا
أما الورم دا مقدر أفتي فيه البيطري لازم يشوفو
عندي ملاحظة بخصوص الفيتامين
أتوقع الكمية اللي حطيتها كبيرة عشان كدا تغير لون الموية بدي الدرجة
الفيتامينات لها مقدار وطريقة إستخدام وكمان في فترات تمنع الفيتامينات
وبالتوفيق يارب