رد: يأ أصحاب القطط
حرد على السؤال التاني اول ذكر ام انثى على كيفك انتي بس لا تنسي كل قط بهادي الحياه ولو مميزاتو الخاصه اللي تميزو عن غيرو من القطط
بس يفضل يكون لعوب وهادي بنفس الوقت عشان إنتي ترتاحي .
أما عن السؤال الاول من تجربتي الشخصيه كان زمان عندنا كاسكو > هداك ابو ديل احمر الغبي
وكذا مره اشترينا كروانات > هديك البيضا والرماديه ام خدود حمر
أول شي الببغاء مو كلهم سوا ومو كلهم بعضهم يحتاج وقت طويل عشان يولف على صاحبو وكمان يولف لأهل البيت
والببغاء موجود بالقفص اغلب الوقت خصوصا لما يكون جديد فـ ماتلاقيه يروح ويجي يمشي بالبيت يعني لازم إنتي تكوني عند القفص
الببغاء لما مايكون اليف ماتقدري تلعبي معاه وتنبسطي معاه ولا تحسي بشي
والببغاء صراحه اوساخو كتير مره يعني لازم كل يوم او يومين تنضفي من تحت القفص كلو عشان الروائح ولما ياكل فصفص او اكلو ينثر من حوليه
وأحيانا في ببغاوات مززززعجه طوووول الليل حتى وإنتي نايمه تجلس بس تزعق معرف إيش عندها
ممكن لو اخترتي بين مكاو وقط = وقتها اقولك مكاو وبعدين بعد فتره اشتري قط لأنو صراحه الاتنين ممتازين بكل شي إن بالهدوء أو بالتسليه أو بكل شي بس القط انظف
. قلتلك عن خصائص الببغاوات
أما القطط :
نظافه لا يعلى عليها ماشاءالله عمري ماشوفت قط يعملها برا الليتر بوكس
وجدا جدا جدا مسليه خصوصا لما يكون قط صغير لعوب تحسي الدنيا كلها تتغير تحسي في شي يتحرك بالبيت معاكي
ماتطري تروحي مكان معين عشانو بالعكس لما يكون هوا يعرف إسمو ,, يجيكي ألمن عند رجلك ويتحنن فيكي
أكلو عندو نظام معين إنتي تفرضيه عليه وهوا حيكون لكي سمعاً وطاعه إذا صغير ممكن 4 وجبات باليوم
أما لو كبير من وجبتين لـ تلاته
والحلو بموضوع الاكل تقدري تعمليلو اللي يعجبك صحيح فيه قطط ماتاكل أي شي خصوصا الكبيره بالعمر لأنو هيا من زمان تعودت على شي معين
لكن لما يكون قط صغير بالعمر وتربيه تقدري تخليه ياكل اللي إنتي يعجبك وتعوديه عليه وأحلى شي لما تشوفيه ياكل تجلسي بس تتأملي وماعمري شفت قط ممم زي مايقولو دفش وقت الاكل يعني بالنسبه للقطط هادا وقت الهدوء والاكل رجاءً لحد يعمل ضجه خلوني اكل بسلام
القطط تمشطيها كل يوم ويفضل مرتين باليوم عشان الشعر يكون ناعم ومرتب وشكلو يفتح النفس ولتفادي العقد خصوصا الشيرازيه لازم تمشيط كل يوم لأنو شعرها الطويل الناعم لازم يجلس زي ماهوا وهادا عن طريق عنايتنا فيها
وفي تطعيمات للقطط جدول التطعيم يقيها ويقينا من الامراض بإذن الله وهادا مهم إذا حتشتري قطه ومايطعم القط الصغير إلا بعد مايكمل شهرين عشان مناعتو تكون أقوى
والقط يحب ينام بكل مكان ممكن بسريرك او بسريرو إذا عجبو وحبه أو بأي مكان يعجبو ممكن اماكن غريبه لكن خلاص دام مرتاح هادا أهم شي وحلو لما تشوفي القط نايم احيانا تطلع من القطط حركات تضحك وهما نايمين اشكالهم كيوت مره
ممم الامراض . القطط أحيانا تصاب بالامراض وهادا شي طبيعي زي أي حيوان لأنو حتى الببغاوات تصاب بالامراض كمان
بس لما نهتم بغذائها يكون مغذي وصحي جدا وبعنايتها إن شاء الله ماتواجهي أي مرض بإذن الله
عليكي تشيلي الاوساخ من الليتر بوكس يوميا مره باليوم مثلا او متى ماتحبي أنا عن نفسي أحس إني زي الحارس من لما يدخل قطي تلاقيني واقفه عند راسو استناه يروح عشان اشيل من بعدو والحمدلله جدا مرتاحه معاه لا بيوسخ ولا شي
ميزة القطط إنك تقدري تلعبي معاها وتحسي فيها بين يديك وتقدري تدلعيها وتدربيها وتكون قطط مافي أحلى منها وتكون مطيعه
لأنو زي ماتلاقي ببغاوات مطيعه القطط كمان مطيعه
ممم هادا الموضوع لازم تفكري فيه إنتي وحدك إحنا مانقول لازم تشتري معرف ايش عشان خصائصو معرف إيش
هادا شي حيكون معاكي ملازم لكي
إنتي فكري وشوفي لمين ترتاحي ومين تحبي يكون بالبيت معاكي يتحرك وتتسلي فيه الببغاء أو القط
بس بصراحه عن نفسي وقرارة نفسي ورأيي الشخصي جداً : القطط أفضل من أي حيوان أليف .
فـ لا تحتاري فكري بهدوء وراجعي نفسك وروحي المحلات اذا تحبي خذي فكره مجمله عن الاوضاع ومري عالقطط الأليفه وفي قطط صغيره وببغاوات معروضه للبيع تكون قربي منها والمسيها وشوفي نفسك لمين ترتاح .
|