البيضة انكسرت داخل الطيرة .. ما الحل؟؟!!

[abu hasan]

السلام عليكم

قبل يومين بالليل وقعت طيرة حمام شغالة من السطوح بارتفاع طابقين والمشكلة إنها مقصوصة .. ثاني يوم كانت حركتها بطيئة ويا دوب قادرة تمشي لكن الحمد لله ما فيها كسور وظلت قاعدة في التنكة معظم الوقت .. لكن المشكلة لما مسكتها مشان أفحصها لقيت إنه كاين عليها بيضة وجزء من داخل البيضة طالع من مخرجها وحاولت أسحب منه قد ما قدرت لكن طبعا قشر البيضة (الأولى) لسة في بطنها ما فحصتها بعد هيك لكن لاحظت إنها أنشط شوي ومشيتها أحسن لكن لسة مبين عليها التعب .. يا ترى شو الحل في هاي الحالة (لانها أول مرة بتصير معي) يعني أتركها ورح يطلع قشر البيضة الأولى المكسور لحاله لما تبيض البيضة الثانية ولا شو أعمل بالزبط ولا الطيرة خلص هيك انعطبت

بانتظار ردودكم ونصائحكم ويا ريت بسرعة .. تحياتي للجميع

[رائد ملكاوي]

والله ياى ابو حسن انت وحظك

يعني تقدر تطلع بيضة كاملة ومتعسرة الحمامة بوضعها

لكن البيضة اذا انكسرت داخل الحمامة مشكلة

اللي تقدر تعمله حاليا

جيب نكاشة اذان اللي على اطرافها قطن وحط عليها زيت زيتون او فازلين طبي

دخلها في فتحة المجمع ولفها بحركة دائرية حتى يصير توسع

وبعدين جيب البكلة القديمة اللي يكون لونا اسود ويحطوها البنات بشعرهم

دخلها بحذر وحاول ارفعها للأعلى وبعد ماتدخل نزلها لتحت واسحبها وكرر العملية باتجهات مختلفة لعل وعسى

وان شاء الله يطلعوا قطع البيض قبل ما يصير التهاب وتفقد الحمامة

والله يشفيها

وخبرنا ايش بير معك يا قلبي

[abu hasan]

مشكور اخوي رائد .. تسلم يا رب

بس يعني لازم هاي العملية الحساسة والمعقدة قصدي ما في احتمال انه البيضة الثانية تدفع قشر البيضة الأولى لبرة ونخلص من هالسولافة

شي ثاني .. في حد حكالي انه كشيشة الحمام بكسروا البيضة عمداً داخل التخبيطة مشان ما تبيض ويضلوا يخبطوا فيها لما يزهقوا يا ترى صحيحة هاي المعلومة وإذا كانت صحيحة معنى هالكلام انه ما في خطر ع حياة الطيرة اللي عندي .. شو رأيك

[رائد ملكاوي]

ممكن انه البيضة الثانية تدفعها

فانتظر 44 ساعة بعد البيضة الاولى وشوف اذا باضت انتهت المشكلة واذا صار احتباس لازم تساعدها واذا ما باضت تعمل سولافة البكلة

وفعلا الكشيشة لازم يكون عندهم انثى عقيم علشان كل الذكوووووووووووور يتزوجوها هههههههههه

وتصير انثى لكل الحارة وتصير تجيب من هالحمام وتحط عندك (بس هيك سرقة طبعا)

وصحيح يعملوها انهم يكسرو بيضة داخلها

او يختارو انثى عمرها كبير ومقطعة

[abu hasan]

إن شاء الله اليوم المسا بشوف الطيرة كيف وضعها وباضت ولا لأ .. والله يجيب اللي فيه الخير

مشكور مرة ثاني يا غالي .. ما قصرت

[abu hasan]

أيوة يا اخوي يا ملكاوي .. والحكي للجميع طبعا

امبارح شفت الطيرة لكن في وقت متأخر من الليل .. فحصتها لقيت منطقة أسفل البطن مثل ما هي عبارة عن جورة فاضية ويبدو انه مش بس البيضة اللي انكسرت حتى عظماتها (الشوكتين) أو عالأقل واحدة منهم اتكسرت كمان

طبعا ما جربت سولافة البكلة .. لانه زي ما حكيتلك الوقت كان متأخر ولسة بدي أجيب زيت ولا فازلين وبكلة وأصير أزعج في الطيرة في هيك وقت لقيتها مش حلوة (هاي كانت حجة طبعا)

بدك الصراحة أنا مش رح أقدر أعمل سولافة البكلة هذي .. فشو رأيك أعزمك ع فنجان قهوة وانته تفحص الطيرة وتجرب سولافة البكلة وأقولك ما في داعي تجيب أي أدوات معك .. البكلة وباقي الأشياء من عندي (ع أساس بحاول أقنعك يعني )

وعسى ربي يجعل شفاها على ايديك يا دكتور رائد ملكاوي

لا تتسرع .. فكر بعدين رد عليّ

[رائد ملكاوي]

ههههههههههههه

انت متاكد يا غالي انه وحده من الشوكتين مكسورة

بالعادة كسر احدى الشوكات يكون بسبب دفاشة المربي

اما سقوطها فصعب يكسرها الا اذا ما الها حظ

وخلينا اليوم نشف اذا باضت او لا للمساء

وانا الي الشرف ازورك يا غالي

واذا صار لي مشوار على عمان صدق لازورك

لكن ما حكيتلي ايش نع الحمامة يا قلبي؟

[رائد ملكاوي]

صحيح وانا بشتري طقم بكل ههههههههههه

[abu hasan]

والله انا بتشرف بزيارتك يا غالي .. وترى وعد الحر دين عليه

الطيرة هاي عادية أظن بندوقة بولنديات .. لكن الحلو فيها ثوبها لون مسكي (مفصص) فاخر من الآخر .. والأهم من هيك انها حنونة وممتازة في تربية الفراخ

بالنسبة للشوكتين أنا مش متأكد .. لكن حسب الفحص السريري اللي عملته امبارح أظن والله أعلم في إشي مكسور وكمان ما حسيت انه في بوادر لبيضة ثانية عالطريق .. تنشوف اليوم المسا شو بصير

والله يا خوفي تصفي تخبيطة بعد كل هالجهود الجبارة في غرفة التفريخ

[رائد ملكاوي]

بانتظار البيضة التانية ان شاء الله