عندي كاسكو اتوقع انه يحب النساء ارجو المساعده

[Khaled bin Abdullah]

السلام عليكم ورحمه الله وبركاته

حقيقه هذي اول مشاركه لي في هذا الموقع الرائع

عندي ببغاء كاسكو له تقريبا 4 شهور وانا مستغرب منه فعلا اي رجل يقرب منه او يعطيه اكل او ينضف مكانه يجعر جعير يقهر اما بالنسبه لاهلي الوالده الله يطول في عمرها او خواتي يقربون منه ويأكلونه ويلعب معاهم زي العسل رغم اني انا الي اعطيه الاكل واهتم فيه بس كل ماقربت له قام يجعر واللي لاحضته منه انه يخاف من الوجه يخاف من وجهي واي شي غير وجهي مايخاف منه يركز على الوجه ناهيك عن جعيره حقيقه قهرني اوقات افكر اني اضربه من القهر رغم اني اجوعه واخليه ياكل من ايدي فول سوداني بس ياكل وهو ينتفض وكل ماقربت له شوي شوي نفخ ريشه في الحقيقه اربع شهور وهو على نفس الحاله قهرني الي عنده طريقه لتعامل معاه لايبخل علينا مشكورين

وهذي صورته

[هامستر كوم]

هذي مزاجاة في الببغاء

قل للوالد والاهل انهم

ما يعطونه وجه وانت

غسل القفص له

ولا يهتم فيه الا

انت وان شاء الله

تشوف نتائج

طيـــبــهــــــ

تحياتي

[Khaled bin Abdullah]

مشكور اخوي هامستر على تجاوبك معاي وهذا الي جالس اسويه مثل ماقلت خليته في غرفتي وانا الوحيد الي اعتني فيه لعله يفهم بس ماقهرني فيه الا عناده واحيانا اجوعه واخليه ياكل ياخذ الاكل ويرميه مشكور اخوي هامستر مره اخرى

[ابو محمــد]

حياك الله في المنتدى ويسعدني اني ارد ع سؤالك ,,
موضوعك بسيط جدا والمشكله ممكن الببغاء ماخذ موقف من صاحبه,,
والطير ما بعد تعود عليك وسبحان الله مع الوقت راح يحبك ويوالف عليك,,

[Khaled bin Abdullah]

مشكور اخوي ابو محمد صبرنا عليه 4 شهور وراح نصبر عليه اكثر معلومات كنت بحاجه اليها مشكور جزيل الشكر

[بندولة حب]

اخوي فيه احتمالين
اولهم وهو الاكيد
ان ببغائك ذكر والذكر مايحب الرجال والانثى عكسه
وهذي المعلومه معروفه في الببغاوات
وانا عندي ببغاء لما يشوف رجال او يسمع صوته يظطرب ويتحرك واجد واذ سمع صوته جلس ينادي ولما يشوفني او يسمع صوتي والله مايهمه وعلى قولتك انواع القهر انا اتعب وغيري يجيه بارد مبرد
والاحتمال الثاني
انه اخذ موقف من رجال ومالك الا انك تبين له ان نيتك زينه معه ولا تلبس ثوب ولا شماغ قدامه البس اي شي بس مايكون لونه ابيض
والله يعينك

[ابو محمــد]

اولهم وهو الاكيد
ان ببغائك ذكر والذكر مايحب الرجال والانثى عكسه
وهذي المعلومه معروفه في الببغاوات

الله يذكرك بالشهاده يا بندوله وانا اتفق معاااك

[naasooh]

الحمد الله علاقتي طيبة بالنثية والذكر
أنا أقول الكاسكوو ذكي جدا
وفيه مزاجية سبحان الله

ممكن يحب شخص
أو يكره من أول ما يقرب عنده يعضه كأنه مستقصده مااعنه أليف
وممكن يكون متعلق بشخص بعدين يتغير عليه وأعتقد الكثير منا حصلها هالشئ وكل واحد عنده قصة

فأنت تقدر تستغل هالوضع ألي حاصل وعن طريقهم يتروض الطير
أو
تفرض نفسك عليه بدون ضرب طبعا
وصدقني ألطير اذا عاملته معاملة ممتازة راح يتعلق فيك

[Khaled bin Abdullah]

كلامكم صحيح لان الي اشتريته منه قالي انه صاحبه الاول ضربه وصار يجعر كثير بس ماتوقعت انه حساس لهذي الدرجه وفي الحقيقه اشكر الجميع على الردود اللي فعلا استفدت منها وراح اعمل عليها وعقبال النتائج الطيبه

[عاشق الكاسيكو 11]

انا اتفقك مع اخواني على الكلام الي فوق

لكن شف في هذي الفترة لا تخلي احد يزعجه بالذات المبزره وانت بس غير له الاكل ونضف القفص

وسبحان الله بيحبك صدقني مجربة وانت سوها لمدة لين تحس انها كافيه يعني ممكن 20 يوم كويس

وان شاء يكون تمام التمام معااك يلا بايو