عصفورتي عصفورتي سؤال + نصائح

[آيس موكا]

السلام عليكم ورحمه الله وبركاته اخواني واخواتي

هذا اول موضوع لي وبإذن الله ماراح يكون اخر موضوع

انا طبعا عزوبي وساكن لحالي وكذا وطالب جامعي

فا تعرفون اثار الفراغ العاطفي والفراغ الغير عاطفي والضغوط النفسيه والغير نفسيه ومشاكل مشاكل ...الخ >>>وش يقول هذا

المهم ما اطول عليكم

بينما كنت جالس الحالي بالغرفه وجالس افكر بالمستقبل وكذا جا ببالي اني اشتري حيوان الله يكرمكم يعني عشان يسليني ويآنسني بوحدتي وكذا وبنفس الوقت اقضي وقت فراغي فيه واجرب تجربه جديده وحلوه

بس وش اشتري ما ادري..!

فكرت بقطوه؟؟

لقيت مشكلتين فيهم اولا الغرفه صغيره وبتبهذلني وانا اصلا بروحي متبهذل من حوستي هههههههههههه
شلون لو بجيب قطوه

وثانيا اسعارها غاليه وكذا ومووش اد جيب طالب جامعي

فا لما رحت المحلات وجلست اتفرج لقيت انسب شي يا اما سمك ولا طيور ولا هامستر

الهامستر ما تحمست له كثير قلت مافيه اي ميزه يعني ما احس انه كويس ويونس كثر الطير او السمك

فا لما رحت المحل سألت عن السمك وقال يبي لك تشتري لها حوض ومعه جهاز ومدري ايش فوق الميتين ريال..!

وانا اصلا مكافئتي وراس مالي 840 اروح ادفع ربعها على سمك؟؟

فا قلت بتوكل على الله واشتري لي طير ايضا بمشوره الشباب انه اسهل تربيه من السمك وانظف السمك يبي لك تغير مويه وخرابيط ووصخ وقرف

قلت اوكي سألته وش الطيور اللي عندك طبعا ابي طير للتسليه يعني مابتاجر ولا شي قلت ابي شي صغير يكون وووهذا مايزعج وصوته قوي تعاطفا مع روميتي او اللي هو شريكي بالغرفه

قال لي راعي المحل فيه هذي طيور الحب قلت بكم قال لي الجوز ب150 جلست افكر شوي طلعت جيبي لقيت مامعي الا ميه

قلت انا مامعي الا ميه الحين ابي اخذ حبه وبعدين اخذ الثاني

قال لي خذ الحين انثى ب60 ريال ومع القفص والاكل ب40 ريال يعني كلو على بعضو 90 ريال

احس انه مضحوك علي طبعا بس مافكرت اهم شي اجيب لي شي يوسع صدري من الطفش

كاسرته يمين يسار والله مايجي وهذا اخر سعر قلت اوكي توكلنا على الله بس بشرط

نزوجها بسعر اقل

قعد يضحك حبيبنا الهندي اللي يشتغل بالمحل قال خلاص انت تعال بعدين وجبها معك وبعطيك الذكر ب50 قلت زين ماشي

طبعا مدري ودي اجيب لها ذكر وودي اخليها بعدين مدري

المشكله انها ساكته الحين مالها صوت مدري مستحيه مني مثلا

ولا زعلانه عشان بعدتها عن حبيبها حسيت اني متوحش صراحه شلتها الحالها

المهم باختصار شريت انثى مع قفصها وعلبه اكل اسمها الكروان ( حب لطيور الحب)
كلها ب90 ريال سعودي طبعا

ووالذكر قال لي اعطيك اياه ب50

هل السعر هذا معقول؟؟ ولا لاعب علي؟؟

غير هذا انا عارف اني بانبسط عليه شوي بعدين بأمل منه فا قلت بشتريه الحين وبعد 3 اسابيع اذا رجعت لاهلي بالرياض عطيتهم اخواني وخواتي الصغار هديه يتسلون فيها وكذا ((عشان اشبكهم واذا بغيت العب بلاي ستيشن يلعبوني ))

يعني شرايكم بالسعر كويس ولا لا ؟؟

ووالشي الثاني صورتها لكم وعطوني رايكم فيها بشكلها وكذا حلوه ولا لا وبالنسبه للذكر بعدين اذا بغيت اشتري وش تنصحوني اشتري وياليت ترفقون صوره الزوج اللي تخق معه مابي واحد مايعجبها

ابي واحد مناسب لها يعني يدلعها وكذا وان بغت تروح لأهلها يوديها لأهلها مايكون قاسي ويقول لها الحرمه مالها الا بيتها >>>خش جو عائلي ههههههههههه

والله العزوبيه مشكله

ايه نسيت اقول لكم ترا انا خايف من شي انها ماتطلع صوت مدري عشانها ماتعودت علي مثلا ولا وش السالفه

راعي المحل يقول لها صوت خفيف بس انا ماسمع شي مدري هل بعدين مع الوقت تتعود وكذا ولا لازم اجيب لها زوج عشان تنبسط وتطلع اصوات وتغني له وكذا ولا كيف؟؟

عموما اسف على ثقاله الدم ولكم الصور

























هذي صور جولييت حقتي

واستفساري باختصار هو

ما رأيكم بالسعر هل تعتقدون انه مناسب ولا مرتفع بزياده؟؟

ليش ماتطلع صوووت هل لأنها ماتعودت علي ومع الوقت ان شاء الله بتتعود عالمكان وكذا وتصير تغرد وحركات ولا لأنها ماعندها روميو مثل هذا اللي بالمقطع؟؟ ((انصحكم تشوفونه تراه بطل ))

http://www.youtube.com/watch?v=Cf5HqysNVXg

والسؤال الثالث هل تنصحوني اشتري لها روميو ؟؟؟ ولا يكسر خاطرها ويخلي نفسيتها تعبانه مره مثل اللي بالمقطع .

يعطيكم الف عافيه ولاتبخلون علينا بالنصايح

وممكن يجي احد يقول اقرا المواضيع حقت المبتدئي والله قريتها بس يعني احس كذا كلام واشياء واجد فا ما استوعبت ابغى باختصار الله يعافيكم نصايحكم لي

وتكفون لحد يضحك علي ترا ادري ماعندي سالفه

وجزاكم الله خير حبايبنا

[%لوب ذهبي%]

هلا اخوي ومرحبا فيك


اولا طيرك ليست من طيور الحب انما هي طير البادجي وهي انثى بالغه جاهزه للانتاج (ادري انك ماتبي انتاج لكن للمعلوميه )

اما عن السعر فاتوقع مناسب (يوجد ارخص )


واما عن الصوت فاتوقع بان الاناث قليلة التغريد اما الذكور فحدث ولا حرج انواع الازعاج

واي سؤال انا حاضر هنا او على الخاص

[صمت الأمل]

السلام عليكم ..


مثل ماقال لك أخوي لوب ذهبي .. هذا بادجي وهورمة (( مثل ماتوقعت أنت انها تستحي..خخخخ))


وأما السعر .. عندنا في الرياض الجوز ب100 ريال .. وأحيانا أغلى من كذا ..

والحب الكيلو بـ 8 ريال أو 10 مع الفيتامينات .

وبصراحة لو سألت المنتدى أول قبل ماتشتري عشان نقول لك خذ الذكر أحسن من الحرمه عشان يرد الصوت عليك ..

بس ميب مشكلة حصل خير ..


مالك الا انك تجيب لها روميو وتعطيه شوي سبانخ بعد ..خخخخ .


واذا هي معها ذكر يوم شريتها فأحسن ترجع تاخذه .. لأنك اذا جبت لها ذكر غيره وماتوالفو بتصير لك مشاكل وضرب وازعاج >> نفس اللي صار لبباي ..


ومادامها جاهزة للتزاوج جيب لك عشه خليها عندهم وان شاء الله يبيضون لك وتشوف ورعانهم ..


بالتوفيق .

[عاشق الطيور a t]

وااااااااااااو يس اخوي مو عارف ليش احسها مريضة الله لايقوووول عالعموووووم حبيبي ترى البرد مضر لها وااايد

غطيها بشئ واحميها من البرد وبالنسبة للاسئلة

1ـالسعر وايد مناسب فيه ارخص بس هاذا منااااساب كمااااان يعني السؤال تمااام

2- بالنسبة لروميو انصحك وبشدة ياسكر وتحط لهم بياضة اللي هي االعش وباذن الله يبيضوا وخذ نصيحتي وماتندم

3-بالنسبة للصووت واااااااايد عااادي ووحيدة والمكان جديد عليها فالذكووور افضل في التغريد

واخوي اذا يمديك تاخذ طيور الفيشر والله وايد احلى واااااايد وسعرها 250 الجووووزز ومناعته اقووووى حتى انتااااجة سهل

[آيس موكا]

والله تحمست ههههههههههههههههههه

انا اصلا لو اقول لكم شلون مسكت معي عشان اشتري الطير ههههههههههه

بكلاس الفيزياء من الفضاوه سرحت بخيالي الواسع الين وصلت الحيوانات تكرمون وكذا

فا قلت بشتري حيوان وطلعت من المحل سحبت 100 ريال >>> يعني بالعربي يبي اي حيوان المهم سعره مناسب للتسليه فقط

لكن حمستوني شكلي بزوجها وكذا واضبط لها الجو واخليهم ياخذون راحتهم

((اثاري الهندي لعب علي يوم يقول لي هازا تويور هووب ..!)) وطلعت مو حب

ماعليه المهم انه كائن حي يتحرك واشوفه واشتاق له واوكله واجي واحصل الاكل ناقص واحصل يعني تغيرات واشياء حماسيه

وبالنسبه للزوج هي كانت مع مجموعه طيور من نفس نوعياتها بس الوان مختلفه وبقفص كبير يعني ماكانوا زوج الحالهم

كان حوالي 10 طيور بقفص كبير مع بعض فا مالها زوج معين ((الله يهدينا وياها ))

وان شاء الله بشتري لها الزوج المناسب بس فيه لونين اصفر وازرق وش اشتري هههههههههههههه ((خذت ازرق للانثى عشاني هلالي هع )) مدري الزوج احسن اشتري مثل لونها ولا لون مختلف ولا ماتفرق

وبالنسبه للبياضه او العش مدري وشو يعني اللي يبيضون فيه

انا القفص اللي عندي عادي قفص صغير يدخل فيه ؟؟؟ ولا لازم قفص كبير وحوسه..! ودي صراحه اكاثرهم واربيهم واذا كبروا اوزع على اخواني هههههههههه>>>متوحش بيفرق شمل الاسرره
اخواني بسم الله عليهم 4 فا ودي اجيهم الرياض ومعي هديه لهم وكذا فا مدري

وبالنسبه للتزاوج وكذا ((اخر سؤال معليش ادري ثقلت عليكم)) كم يبي لهم عشان يتزاوجون ويبيضون وكذا وهل تزاوجهم له موسم معين او فتره معينه ولا بأي وقت..!

والفروخ اذا ان شاء الله ربي رزقنا بهم كم ياخذون فتره عشان يعني يكبرون وتطلع لهم اصوات واشكال حلوه ؟؟

جزاكم الله الف الف خيييييير واعذروني طولت عليكم وكثرت عليكم اسئله بس تعرفون واحد جديد بهالشغله ويحب يتعلم ويجرب

يعطيكم الف عافيه

[آيس موكا]

معليش نسيت حاجه

بالنسبه للأخ عاشق الطيور متأكد ياخوي انها مريضه ؟؟؟

يعني فيه شي واضح مثلا من شكلها او شي كانه فيه علمني تكفى اروح ابدلها مابي اخذها وبكره تموت علي..!

واذا تعرف وش المرض بالضبط علمني عشان اتفلسف عند الهندي واحسسه اني فاهم عشان مايضحك علي

ضحك علي وقال لي طيور حب قلنا مو مشكله اهم شي انه طير بس مريض مشكله صراحه..!

ضاق صدري شوي

ياليت تعلمني بالتفصيل واذا بغيت صور او فديو او اي شي انزل لك مو مشكله بس اهم شي اعرف بالضبط هي مريضه ولا لا وجزاك الله خير

[vision]

ان شاء الله انها مو مريضه..انت روح قسم البادجي وراح تعرف كل شي تبيه من المواضيع الهامّه

.:شكريآآآتي:.

[آيس موكا]

والله حبيت هالقسم صراحه
صح انكم كرشتوني لقسم البادجي هههههههه
لكن قاااعد على قلووبكم وترقبوا قريبا بشتري طيور حب بسسس عشان القسم هذا هههههههه
جزاكم الله خير ويعطيكم العافيه على ردودكم واتمنى من الاخوان المشرفين نقل مواضيعي واللي بالقسم هذا الى قسم البادجي مشكوريين