صور للقفص الجديد والعش+كم سؤال ارجوا الافاده

[آيس موكا]

السلام عليكم ورحمه الله وبركاته

ادري كثرت اسئلتي ومواضيعي لكن تعرفون مبتدئ

بإذن الله فتره بسيطه وتحصلوني خلاص صرت محترف واصير انزل مواضيع افيدكم فيها وبتجاربي

سبحان الله مدري ليه احس اني ببدع بتربيه الطيور ههههههههههههه

سوي حركات واجد واعجبتني انها طلعت مني بدون ما اسأل احد

مثل صرت اشيل العصى اللي يوقفون عليها وادخل يدي بالقفص واحطها عند رجولهم وهم يوقفون عليها

ايه ابشركم اليوم كلوا من يدييييييييييي

سويت طريقه احد الاخوان اللي تجوعهم 6 ساعات بعدين تحط لهم الاكل سويتها امس العصر ماضبطت سويتها اليوم الصباح شلت الاكل عنهم ولما خلصت من الدوام جيت قلت بجررب وفعلا طاروا على يدي وجلسوا ياكلون لما خلص الاكل

لكن يوم طلعت يدي عشان اعبي اكل ثاني ودخلتها ماكلوا صاروا يطيرون ويهربون

مو مشكله اهم شي كلوا ومع الوقت بيصيرون اصدقائي

المهم يا اخوان تجربتي على انها في بداياتها لكني استنتجت اشياء كثيره من جهدي

حسيت اني فاهم لهم

عرفت ان الانثى اللي عندي اجرأ من الذكر الذكر خواف حتى يوم الاكل الانثى كلت من يدي اول بعدين يوم شافها الذكر تاكل نط على يدي وجلس ياكل شوي بعدين يهرب بعدين يرجع مره ثانيه خواف هههههههههه

تجربه ممتازه صراحه وممتعه

المهم سؤالي هو اني انا ركبت لهم عش وغيرت القفص كله ولي تقريبا اسبوع او اكثر وللحين ماعمرهم دخلوا العش ..!

مدري هل شي طبيعي ولا العش مو مناسبهم حبيت انزل لكم صور العش وتعطوني رايكم اذا يناسبهم وهالشي طبيعي انهم مايدخلونه فا كويس واذا مايناسب رجعته لصاحبه

انا ادري انه توهم عالتزاوج لأنهم جدد عندي لهم حوالي اسبوعين هم الحمد لله متعودين على المكان وعادي مرتاحين حتى الاكل ياكلون كويس والجرجير احطه وياكلونه واحط خس وياكلون مافي مشاكل

لكن مدري ليه مايدخلون العش ابدا ولا حتى يدخلون يتفقدونه ويشوفون حلو ولا لا

هذي الصور

باختصار اللي ابي اعرفه هو

1/ ليه مايدخلون العش ابدا هل العش مو مناسب او مكانه مو مناسب لأني اشوف اغلب الصور الاعشاش تكون بارزه خارج القفص ولاعادي تتعدد الاسباب والعش واحدُ
او هذا شي طبيعي ويبغالهم شوي وقت واذا كان هذا شي طبيعي ويبي لهم وقت كم يبي لهم تقريبا؟؟ اسبوع اسبوعين شهر شهرين ؟؟؟

2/ الحمد لله العصافير اللي عندي مايتهاوشون ولا شي وهذا شي جيد لكن اللي مو جيد انه ماشوف فيهم علامات التآلف يعني ماشوف الذكر يوكل الانثى وماشوفهم يلصقون ببعض مثل ماقريت بالمنتدى هذا وغيره من المنتديات

وماشوفهم ينظفون لبعض كل واحد بحاله اللهم الاكل ممكن ياكلون من الصحن بنفس الوقت بدون اي مشاكل

بس ماشوفهم فيهم علامات التآلف اللي قريت عنها

هم لهم تقريبا اسبوعين مع بعض اسبوع بقفص قديم واسبوع بقفص جديد اكبر مادري هل المده قليله او عاديه ومع الوقت بيتآلفون؟؟ وايضا كم يبي لهم عشان يتآلفون مع بعض؟؟

3/ المهم عندي صراحه ههههههههه ادري بدري اسبوعين لكن كم يبي لهم عشان يتزاوجون لأني صراحه متحمس ودي اشوفهم يبيضون واشوف شي جديد وتغيررات وحركات كم يبغالهم وقت عشان يتزاوجون مع انه الاكل اعطيهم بشكل مستمر واعطيهم الجرجير والخس مثل نصيحه احد الاخوان بالمنتدى كل اسبوع اعطيهم وجبه خس وجرجير. كم يحتاجون فتره عشان يتزاوجون تقريبا يعني؟؟

4/ الاكل وش ينصح به؟؟ انا اعطيهم يوميا الحبوب المشكله لكن كل اسبوع اعطيهم وجبه الجريجير والخس وسويتها مرتين الاسبوع الماضي وامس
هل النظام هذا كويس؟؟ استمر عليه ولا فيه نصائح اخرى؟؟

5/ بالنسبه للحمام انا استخدم طريقه البخاخ ارش عليهم الرذاذ اول مره هربوا وتخبوا تحت العش لكن الحين احس انهم يفرحون اذا رشيت
اشوفهم يهربون تحت العش بعدين ينطون على العمود ويعطوني ظهرهم عشان يجيهم شوي مويه بعدين ينطون تحت العش بعدين يرجعون عالعمود ويجيهم شوي مويه وهكذا

لكن كم مره استخدم الحمام؟؟

يوميا ولا اسبوعيا ولا مرتين بالاسبوع ولا كيف؟؟؟

6/ اخر سؤال انا حطيت لكم صوره توضح مكان القفص انا طالب جامعي وساكن في سكن الجامعه فا ماعندي لا سطح ولا حوش ولا حديقه منزل ولا غيره عشان احط القفص فيه فا حاطهم عندي بالغرفه وتحت الشباك

والغرفه ساكن فيه انا وشخص ثاني يعني 2 ساكنين بالغرفه هل هذا الشي يضايقهم؟؟ ويسبب لهم ازعاج وماراح ينجبون منه؟؟ ولا عادي مافي مشكله وجودنا معهم بالغرفه مع اننا مانزعجهم ولا شي هادين مره

ثانيا هل المكان مناسب تحت الشباك؟؟ بحيث يجيهم نور الشمس لكن مو مباشر عليهم

وجزاكم الله خير واسف جدا عالاطاله

[LiLi]

في البداية انصحك تغير مكان العش .. خليه من الجهة الثانية

بحيث يكون المجثم متوجه له

و ثانياً .. كأني أشوف داخل العش ورق أو شيء كدا

أما أنك تترك العش فاضي أو تحط قليل من نشارة الخشب

... ... ...

ضع لهم الجرير مرتين في الأسبوع و كذلك البيض

... .... ...

أهم شيء يكون مكان القفص هادئ و قليل المرور بجانبه

أخيرا أقول لك طيورك جاهزة ما شاء الله بس يبغى لها شروط الامان

و تعدل مكان العش و المجاثم و تصبر عليهم

العجلة من الشيطان و الله يوفقك إن شاء الله

نسيت أقول لك الأرجوحة ما لها داعي ما دام القفص معد للتفريخ

[آيس موكا]

يعني العش اخليه بالجهه المقابه ولا كيف؟؟ ولا عالجنبين
يعني احطه بجهه الباب ولا بالجنب اللي يسار الباب ولا كيف
وهل احط العش بالنص ولا بزاويه
بالنسبه للي داخل العش هذا مو ورق هذا نشاره خشب صاحب المحل هو اللي وضعه داخل العش

اسف جدا لك وللكل على طول الموضوع والكلام
لكن اتمنى موضوعي يكون شامل كل الاسئله عشان ما اجلس كل شوي افتح موضوع جديد اسأل فيه

ياليت اختي تجاويين على الباقي الله يعافيك
بالنسبه للحمام وبالنسبه للموالفه بينهم وبالنسبه ايضا لمكان القفص

جزاك الله خير على ردودك وجهدك

[صمت الأمل]

آيس موكا


أول شيء مبرووووك لك الجوز .. بارك الله لهما وجمع بينهما على خير .. خخخخ .

ومبروك بعد على وقفهم على يدك وبدون ماتسأل أحد عن الطريقة .. شكل تربية الطيور عندك غريزة .. أو موهبة مدفونه ..

وبالنسبه للتوالف بينكم اذا وانتو عندهم ويغردون معناه انهم تعودو عليكم وان شاء الله ماهم خايفين منك ..

وأنا عندي جوز بادجي صغار في العمر كنت حاطة لهم العش وكل يوم داخلين فيه ..

حطيت خيوط حق اللي يبنون ويخيطون بها العش وللأسف .. تركو العش .

فنصيحتي لك انك توخر النشارة وترجعها لهم اذا شفتهم باضو ..

هذا هو وقت النشارة عشان تساعد البيض انه مايتبخر منه الماء بسرعه ويفسد ..

وعشان الفروخ مايجيها خلع الرجلين .. اللي هو مرض صعب بس موب خطير على الحياة ..

والبياضة حطها من جهة القفص اليسرى أو الجنب الأيسر ..

والأرجوحة مثل ماقال LiLi لأن البادجي لو حس ان البيت موب ثابت أو يهتز ماراح يبيضون فيه .

والشمس ضرورية لهم خليهم تحتها ومباشر لهم اذا كان في وقت العصر أو أول الصبح وبارده

عشان يتشمسون .. واذا كان فيه هواء بارد وخرهم عنها عشان مايزكمون .

وبالنسبه متى ينتجون انت اذا شفت الذكر يلقح الأنثى فتمام .. وممكن غير الجرجير بذور الفجل .. واذا ماقدرت تحصلها فعادي الجرجير يكفي .. أو تحط لهم تراز بارد بس بكميه بسيطه جدا ..

وان شاء الله بالنسبه لي أنا راح أكون من المتابعين لك ..

وبالتوفيييييق يارب ..

[xkiller]

لم تترك لي الأختان ما أقوله.لكن لبأس بالتكرار.أولا مبروك عليك البادجي و يتربى فعزك.ثانيا يجب أن تنزع الأرجوحة من القفص.و تثبت جيدا المجاثم.و تهتم بالأغذية المحفزة على التزاوج كالبيض بالقسماط والجرجير ...و تضع النشارة بكمية قليلة أو إسحبها من العش.و أخيرا فأرجو لك التوفيق

[آيس موكا]

الله يجزاك الف خير اخت صمت

بس انا اقصد بالتوالف انهم هم احسهم مو متوالفين مع بعض يعني كل واحد بحاله ماشوفهم يلعبون مع بعض ولا ينظفون بعض او يأكلون بعض لكن معي الحمدلله تمام

انا جدي عنده مزرعه (((ايا ايا اوووو)) هههههههههههه لايمكن هي فعلا وراثه من جدي وعمي عندهم طيور ومواشي وحيوانات بالمزرعه حقت جدي فا ممكن وراثه منهم

انا شلت الحين النشاره وخليت العش فاضي مافيه شي وان شاء الله يدخلون لقيت النشاره كثيره حاط شلتها كلها نهائي

بس كيف ارجعها اذا باضوا؟؟ يعني اشيل البيض واحط النشاره وارجع البيض؟ مايضر البيض؟؟ ولا كيف؟؟

الحين عرفت الجواب لأغلب اسئلتي الاكل وعرفنا انه مرتين بالاسبوع احط جرجير ولا بيض بالبقسماط

والعش شلنا منه النشاره وغيرنا مكانه والمجاثم ثابته

لكن باقي سؤالين اللي هو حمام الرذاذ كم مره ابخ عليهم بالبخاخ؟؟ اسبوعيا ولا يوميا ولا كيف؟؟

وبالنسبه للتآلف كيف اخليهم يتآلفون مع بعض يعني يصيرون حبايب وكذا ودي اشوف الذكر يوكل الانثى وودي اشوف الانثى تنظف الذكر مثل ماقريت بالمنتديات

انا هاوي تصوير بعد وتقريبا صورت اغلب الوضعيات والحالات النفسيه لطيوري صورتهم نايمين صورتهم ياكلون صورتهم يتثاوبون صورتهم يتمغطون صورتهم يطيرون بس ودي اصورهم وهم يتزاوجون اصور الانثى وهي تبيض

اصور الذكر وهو يوكل الانثى وودي اصور الانثى وهي تنظف الذكر ودي اصور كل شي ههههههههههه حاط الكام جنبهم واي حركه غريبه وتعجبني اصورها

اشكرك اخوي اكس كلر على النصيحه وانا عملت بها وشلت النشاره وان شاء الله اشوف الانثى تدخل العش لو ماتبيض مو لازم بس اهم شي تدخل ابي اشوفها تدخله


همسه للأخت صمت الأمل//سرقت حركة التنسيق حقتك ههههههههه

[صمت الأمل]

خخخخخ .. سرقت التنسيق ؟؟

لا عادي أصلا الحقوق محفوظة ..

ومعليش مانتبهت اني ماجاوبت لك السؤالين الباقيه ..

في الشتاء صراحة الجو مايشجع .. فاترك الترويش عشان صحتهم مايزكمون ولا يجيهم التهابات الصدر لاقدر الله ..

الا اذا شفتهم يتوصخون بسرعة فمرة واحده في الأسبوع وفي الظهر .. عشان يمديهم ينشفون ومايدخلهم البرد في الليل ..

والنشارة رجعها لهم اذا شفت الذكر لقح الأنثى .. ولا تكثر منها بس شيء يغطي سطح البياضة ...

والتوالف .. هو على حسب .. الجوز اللي عندي والله اني قلت شكلهم ماراح يتوالفون .. نفس مشكلتك , ماحد يدري عن الثاني ولا أحد يعطي الثاني وجه ولا ينظفون ريش بعض ولا يوكلها ولا شيء ..

وقعدو على هالحاله شهر .. وهالأسبوع الحمدلله صار يوكلها ويمشي وراها وهي تمشيء وراه وتمام التمام ..

بس لأن اللي عندي صغااار في العمر لازم أصبر عليهم كم شهر عشان ينتجون .. والله يعين ويصبرنا ..

[آيس موكا]

هههههههههههههههههههههههههههههههههههه

الله يوفقكم

صراحه احس اني مبدع ولازم اخذ جائزه نوبل للسلام هع

متفرغ لطيوري وقايم بهم على اكمل وجه واختباري النهائي بعد يومين هههههههههههههههه

والله اني اليوم الصبح جالس ساعه ماد يدي انكسرت وانا مدخلها بالقفص ومادها عشان ياكلون

بس الحمد لله بالاخير كلوا بس انقهرت صراحه يوم خلص الاكل وطلعت يدي بعبي حبوب مره ثانيه ماعاد كلوا

بكره بسويها وبصور فديو وباذن الله بوريكم التصوير وهم ياكلون من يدي

[آيس موكا]

هههههههههههههههههههههههههههههههههههه

الله يوفقكم

صراحه احس اني مبدع ولازم اخذ جائزه نوبل للسلام هع

متفرغ لطيوري وقايم بهم على اكمل وجه واختباري النهائي بعد يومين هههههههههههههههه

والله اني اليوم الصبح جالس ساعه ماد يدي انكسرت وانا مدخلها بالقفص ومادها عشان ياكلون

بس الحمد لله بالاخير كلوا بس انقهرت صراحه يوم خلص الاكل وطلعت يدي بعبي حبوب مره ثانيه ماعاد كلوا

بكره بسويها وبصور فديو وباذن الله بوريكم التصوير وهم ياكلون من يدي

[هامستره صغيره]

مالي خبره ،،

بس الي اعرفه ان لازم تشيل الأرجوحه مو زين لأن يمكن يتزاوجون عليها

و هي تتحرك فما يسير كل بيضهم مخصب و الله اعلم