ابغي اشتري ثعبان باثيون حجمه متر ونص - فشو تنصحوني .؟؟

[tanaf]

السلام عليكم ورحمة الله وبركاته


ابغي اشتري ثعبان باثيون حجمه يتعدى المتر ونص


وهذا اول ثعبان راح اشتريه واربيه


وماعندي اي فكره عن الثعابين ...!


إلي عنده فكره عن هالنوع من الثعابين فياريت لو يفيدني

- كم ممكن يوصل طول هالثعبان ... ؟

- الأكل المفضل ... ( عدد المرات التي يجب ان اطعمه بالشهر )

- البيئه المفضله لدى الثعبان .. ( ملاحظه : راح اربي الثعبان بالغرفه وانتو عارفين الغرفه مره تكون بارده مره تكون حاره او رطبه او اكون بالخارج يعني تكون الغرفه حاره فشو تنصحوني هل هناك جهاز لتعديل درجة حرارة الثعبان )

- هل هالنوع سام ، ولو كان حجمه كبير ... ؟؟

- مالآثار السلبيه لهذا الثعبان ... ؟

- ماهي مخلفات الثعابين بشكل عام ... ؟

- بيت الثعبان كيف المفروض يكون .. من زجاج او بلاستيك او كرتون .. الأرضيه .. الطول والعرض ... ؟

- الغرفه اللي عندي مغطى بزوليه (قماش) هل هذا يأثر على حركت الثعبان ... ؟

- هل هناك آثار ممكن يتركها الثعبان بالغرفه اثناء تنقله .. ؟

- هل ممكن ان يكون عدائي .. هل توجد حالات يكون الثعبان فيها عدائي ..؟؟






لو عندك اي فكره حتى ولو كانت بسيطه ، ياريت لو تتكرم وتكتبها للأنها راح تفيدني ، وشكرا لكم



على فكره الموقوع وايد جميل واعضاء حلوين ( اول مره اشاهد مجموعه من الناس يربون ثعابين )

راح تشوفون صورته بعد ماشتريه

[LiMiTeD]

الاساله الي طرحتها كلها موجود اجوبتها بس لو تاخذ من وقتك ربع ساعه راح تعرف كل المعلومات الازمه

ملاحظه:لازم تعرف نوع الاصله الي عندك

[tanaf]

لازم تعرف نوع الاصله الي عندك

كيف اعرف ... ؟

إلي اعرفه من هالنوع شي باللون الأصفر والبني وانا راح اشتري البني ... بس شو السالفه ماعرف

لو عندك فكره فيدني للأني راح اشتريه ومابي اندم عقب


على فكره انا يالس اكثر من ساعتين ادور وقلب بهالمواضيع ادور شي يخص الباثيون ماحصلت إلى معلومات قليله وماتسد




شكرا على مشاركتك

[tanaf]

على فكره وصلني خبر انه يوجد اطول من هذا الثعبان واحتمال آخذ إلي حجمه 2متر



للأني من معجبي الثعابين

[LiMiTeD]

في انواع وايد من الاصلات فاسال الي بتشتري منه واهر راح يقولوك او حط صورتها.

- كم ممكن يوصل طول هالثعبان ... ؟
لازم اعرف نوع الاصله

- الأكل المفضل ... ( عدد المرات التي يجب ان اطعمه بالشهر )
دجاج ارانب فاران كتاكيت(صوص) في هذا الطول كل خمست ايام الى عشره مناسب

- البيئه المفضله لدى الثعبان .. ( ملاحظه : راح اربي الثعبان بالغرفه وانتو عارفين الغرفه مره تكون بارده مره تكون حاره او رطبه او اكون بالخارج يعني تكون الغرفه حاره فشو تنصحوني هل هناك جهاز لتعديل درجة حرارة الثعبان )
عمومة الثعابين الاستوائيه تعيش في درجة حراره بين 24 الى 30 والرطوبه بين الـ60 الى 70 ويوج لدى محلات الزواحف لمبة حراره وتقدر تتوصل الى الرطوبه عن طريق اناء فخار فيه ماء

- هل هالنوع سام ، ولو كان حجمه كبير ... ؟؟
لايوجد اصله سامه

- مالآثار السلبيه لهذا الثعبان ... ؟
ما اعتقد انه في اثار سلبيه بس في الاصلات التي توصل الى 4 متر ومافوق تكون خطر على الاطفال

- ماهي مخلفات الثعابين بشكل عام ... ؟
مثل اي حيوان

- بيت الثعبان كيف المفروض يكون .. من زجاج او بلاستيك او كرتون .. الأرضيه .. الطول والعرض ... ؟
لايهم الماده التي تصنع منها البيت لكن كل ما كان كبير كل ماكان احسن والارضيه ممكن تحط حجار رمل نشارت خشب

- الغرفه اللي عندي مغطى بزوليه (قماش) هل هذا يأثر على حركت الثعبان ... ؟
ما فهمت السؤال لكن القماش لا ياثر

- هل هناك آثار ممكن يتركها الثعبان بالغرفه اثناء تنقله .. ؟
مادري شنو تقصد بآثار لاكن لاتوجد اثار

- هل ممكن ان يكون عدائي .. هل توجد حالات يكون الثعبان فيها عدائي ..؟؟
كل حيوان حتى اصغر الطيور ممكن يكون عدائي اذا اذيته

[tanaf]

limited

مشكووووور على هالمعلومات


بعد سؤال لو ماعليك اماره



هل الثعبان حين يتنقل يترك " بوله" بالمكان الذي كان فيه >> يعني المكان يكون نجس ؟؟ هل هذا صحيح ؟؟

- ماهي مخلفات الثعابين بشكل عام ... ؟
مثل اي حيوان

تقصد بالمخلفات هي براز الثعبان >> اعزكم الله

- هل ممكن ان يكون عدائي .. هل توجد حالات يكون الثعبان فيها عدائي ..؟؟
كل حيوان حتى اصغر الطيور ممكن يكون عدائي اذا اذيته

وش تقصد ....؟؟

تقصد بأنه سام او خطر ... ؟


--- --- --- --- --- --- --- --- --- --- ---

شكرا على ردك

اسف على المغثه

--- --- --- --- --- --- --- --- --- --- ---

[Ghoroub]

السلام عليكم

أغلب الظن إن الأصلة اللي بتاخذها بورمية وهذي ممكن يوصل حجمها لحجم مخيف ما أظن إنها فكرة جيدة إنك تنام معاها في نفس الغرفة خصوصا لو حوضها مفتوح أو سهل الخروج منه أو حتى تكسيره (لو كرتون)

وبما إنك أول مرة تربي ثعبان فما أنصحك بثعبان بهذا الحجم (تخيله وهو معصب وزعلان وبينفخ ويهسهس وإنت توك جديد عليه ويمكن تكون حتى مرعوب من المنظر كيف راح ترجعه حوضه ؟؟؟ )

الثعبان عادة ما راح يبول أو يتبرز في المكان اللي هو فيه إلا لو كان خايف أو مسكته بقوة

هو ما راح يكون سام بس ممكن يكون خطر خصوصا لو ما عرفت تولفه عليك أو ما اهتميت بإنك تغسل يدك وجسمك من ريحة الحيوانات الثانية اللي ممكن يتغذى عليها (عندي رد تايل بوا أولف من الرضيع بس لا تشم عليك ريحة فار ولا طير راح تنعض زي الله واحد)

الحوض المناسب للثعبان يكون حسب حجمه ولازم تراعي إن المكان ما يكون ضيق عليه ولازم كمان يكون الحوض مغلق وصعب الفتح بالنسبة للثعبان (ما ينصح بالأحواض حق السمك واللي عادة الغطاء العلوي لها خفيف الوزن وسهل الفتح أفضل شي أحواض الزواحف اللي لها بابين نفس فكرة الشباك (واحد يجي ورا الثاني وهذا صعب الفتح بالنسبة للثعبان)
بخصوص تركك له في الغرفة اللي تنام فيها (عادة راح تكون أبرد بكثير من الحرارة المناسبة للأصلات لكن ممكن تتغلب على المشكلة بإنك تحط حجر تدفئة وتغطيه بطبقة كبيرة من نشارة الخشب وهي عادة أفضل أرضية من ناحية التنظيف والسعر) وتضيف اللمبة اللي قال عليها أخوي ليميتد عشان فترة النهار (مو شرط يكون نهار بالنسبة لك أهم شي حاول توفر بيئة منتظمة للثعبان يعني 12 ساعة الحرارة في الحوض عالية ويوجد إنارة و12 ساعة ظلام والحرارة أقل من فترة النهار)

بخصوص الأكل بعض الأصلات زي البورمية تحب الطيور وممكن تعطيها سمان ولا صوص بالإضافة للفيران والأرانب وطبعا كل ما كبرت راح يزيد حجمه الفريسة اللي راح تاكلها (أعرف واحد يعطي أصلته خروف صغير كل 20 يوم)

نصيحة أخوية إذا مصمم على الأصلة حاول تاخذ أصغر وحدة موجودة (أو على الأقل ما تكون أكبر من متر) لين تتعود على الموضوع وخلي في بالك الثعبان يعيش في الغالب بين 15-25 سنة ومرات أكثر فلو الثعبان اللي بتاخذه من النوع اللي بيصير 5 أو 6 متر (واللي راح يوصلها خلال أقل من 5 سنين من عمره معنى كذا إنك ملزم تأكل هذا الثعبان وتهتم فيه لفترة طويلة وصدقني ما راح تلقى وسيلة للتخلص منه ببيعه أو حتى إهدائه لأحد لما يوصل لهذا الحجم غير إذا هان عليك وراح تقتله فالموضوع مختلف) وطبعا لو البيت فيه أطفال أقل من خمس سنين أو أشخاص مناعتهم ضعيفة ما راح يكون الثعبان الحيوان المناسب

آسف على الإحباط بس لازم تنتبه لهذي الأشياء قبل لا تتورط وتشتري

تحياتي وأي سؤال إحنا حاضرين

[LiMiTeD]

اخوي Ghoroub ما قصر بالتوضيح لاكن اذا مصمم انك تاخذ هذي الاصله ضيفني على المسنجر وانشالله ماراح اقصر معاك من الالف الى الياء راجع الخاص

[madrule2002]

لازم تعرف نوعها كما تفضلوا الاخوان

[tanaf]

limited

راح اضيفك اليوم ^__*


Ghoroub


احرجني ردك ابصراحه .. شكرا اخوي على ردك الجميل وعلى التعاون


وإذا في اي سؤال تأكد اني راح اكتبه >>>> ههه

لازم تعرف نوعها كما تفضلوا الاخوان

ياريت لو اعرف

وشكرا على ردك وتعاونك


شكرا لكم ^^