منتديات تو زوو - الكاسكو يكسر القلب قولوا لي وش فيه

السلام عليكم ورحمة الله وبركاته

أخباركم ان شاء الله تمام

إلى خبراء المنتدى هذا أول موضوع لي ويا ليت تساعدوني

عندي طير كاسكو ((يعقوب)) له سنتين عندنا

من حوالي شهر تقريبا والطير يوجع القلب ما عاد صار يسولف مثل أول وطول الوقت نايم أو خامل وأحيانا يمر يومين ما يصفر ولا يقول ولا كلمة وقل أكله كثير وجته فترة يجلس بأرض القفص أغلب الوقت يمر يوم يتحسن شوي ويبدأ يقول ( لا إله إلا الله ) ويسلم علينا ويصفر ويقلب عصفور لكن مو أكثر من عشر دقايق ويسكت طول الوقت وينام

صاير ينفش ريشه كثير ويهز ذيله كثير وانتبهت ان فيه انتفاخ بصدره وبحوصلته وكذلك يوجد مادة بيضاء غريبه في احدى فتحات أنفه
وتنفسه متغير ويجهد بسرعة ويغمض عين واحدة ويفتح الثانية بشكل خفيف

الفضلات اللي يطلعها وانتم بكرامة طبيعية

بعد ما بدأ فترة الخمول الغريبه نقلته مكان بعيد عن تيارات الهواء
واساسا الطير بدأ التعب يظهر عليه بعد ما بدينا نشغل المكيفات

لكن المكان اللي هو فيه الآن جوه معتدل لا بارد ولا حار

كل يوم اطلعه بالحوش واخليه خمس دقايق بالشمس (طبعا قبل فترة الغروب)

القفص نظيف والموية نظيفة وأكله نظيف وهو نظيف أنا مهتمة فيه بنفسي

ودايما اسولف معه ويجلس على رجلي وايدي ما اهملته أبد

المهم الوالد يقول فيه (كنكر) ويقول أنا أعلم منك بالطيور ولي فترة طويلة أربي طيور بس طيوره حمام مو ببغاء

وعلى اصراره راح وجاب علاج للكنكر من البيطري وجاب له فيتامينات

طبعا ما رضى ياخذ يعقوب معاه للبيطري لانه اذا قرب عند القفص يبدأ يجعر

نسيت أقولكم أي رجال يقرب من يعقوب يبدأ يجعر عليه ولا أدري وش السبب

عنده عقده نفسيه من الرجال وخاصة اذا لبسوا تي شيرت أحمر يبدأ يصرخ كأنه طفل ويجعر واذا كان برى القفص يطير ويتخبى ورا رجليني او ظهري
وهذا السبب ان ما فيه احد منهم متحمس يوديه للبيطري

هاذي صورة حبيب القلب

لاحظوا الانتفاخ في الحنجرة والشيء الأبيض اللي بفتحة الانف

http://store2.up-00.com/May11/NdR96868.jpg

نظرة الذهول هاذي لأن الوالد واقف قدامه

وهاذي صورة ثانية يا عمري أجنحته متهدلة

والفرق واضح بين فتحتين الأنف

http://store2.up-00.com/May11/Vcb96868.jpg

حاولت بجميع الاساليب والوسائل أنهم يودونه لبيطري لكن لا حياة لمن تنادي

تكفون قولوا لي وش فيه ولهت على صراخة واستهباله حتى ألعابه ما عاد يهتم فيهم