.. ~ فرخ الكروان والعمل ~ ..

[لحن الكروان]

السلام عليكم ورحمة الله وبركاته ...


اخواني واخواتي الكرام ..

أنا هذي اول مرة اشارك بموضوع في هذا القسم الرائع ..

بداية أنا من عشاق طائر الكوكاتيل المعروف بـ(الكروان) ..


ولي فترة في تربية الكروانات وانتاجهم والحمد لله عندي ازواج وفروخ وانتاجات متميزة بفضل الله لكن ما كنت ادخل هذا القسم وماكنت اعرف إن فيه مواضيع رائعة ومهمة وأعضاء رائعين متابعين يومياً بمواضيع رائعه ..

أنا الحمد لله عندي خبرة بسيطة في عالم الكروان ويمكن حبي الشديد لهذا الطائر يخليني أربيه بطريقة نقدر نقول شبة ممتازة بفضل الله ..


ورح أحاول في هذا القسم اشارككم تجاربي مع طيوري من جميع النواحي ..

اطعام الازواج

اطعام الفروخ يدوياً

انتاج الازواج

كيفية التعامل مع الازواج في بعض الحالات المختلفة

الى غير ذلك من الأمور ..

مارح اطول عليكم في هذا الكلام ورح أبدأ في الموضوع الأساسي اللي جايبه لكم اليوم ..


قبل 3 أيام يعني بالظبط يوم الأحد في المساء ..

كلمني أحد الأصدقاء وقالي انو في واحد جابله 5 أزواج كروان يبغى يبيعهم عشان مسافر وكلمني اروح اذا حاب اخذ شي منها لأنه يعرفني اعشق الكروان ..

توكلت على الله ورحت له البيت ..

لقيت عنده الأزواج الـ5

زوجين معاها فروخ وزوجين معاها بيض وزوج ماعنده شي ..

طبعاً وجدت جميع الطيور في حالة يرثى لها من جميع النواحي وتضايقت جداً ..

أولاً الرجال من مكة وجاب الطيور لجدة .. خرج من بيته قبل العصر يعني تقريبا من الساعة 3 وانا رحت شفتهم كانت الساعه 10 في الليل يعني 7 ساعات تخيلوا والطيور في السيارة رايح وجاي فيهم وبهذلة

اللي تحتها بيض قامت واللي معاها فروخ طلعت ووضع سيء جداً

عموماً اخترت زوج من اللي معاهم فروخ واشتريته منه واخذته ورحت للبيت ..

اخذت اكثر من ساعة في البداية عشان انظف القفص واغسله واحط لهم اكل لان مالقيت عندهم لا اكل ولا موية ولا اي اهتمام او رعاية..

والله اول ماحطيت لهم الاكل نزل الزوج زي اللي جاي من مجاعه على الاكل بجنون ..

والفروخ كانت مافيها اي ريحة اكل في حوصلتها .. سويت لها من الخلطة اللي عندي واطعمتهم بالابره .. ونسيت صح اقولكم لما فتحت العش لقيت الرجال حاط لهم بدل النشارة تراب من الشارع معدوم وحالته حاله وكله حجار وحصى

الفروخ تقريباً عمرها أسبوع توهم صغار جداً وكان واحد منهم طايح مو قادر يوقف وكنت خايف يموت

المهم بعد ما انتهيت من هذه العملية واطعمت الزوج والفروخ طفيت لهم النور عشان يناموا

ورحت نمت


لما صحيت وصحيت الطيور وحطيت لهم الأكل والبيض المسلوق للازواج اللي معاها فروخ

وانتظرت الزوج الجديد عشان يأكل الفروخ لكن للأسف كان سلوك الزوج عصبي جداً

كان الذكر واقف عند البياضه زي الحارس ويمنع الانثى من الدخول ويضربها اذا قربت وهو يدخل شوية ويطلع واذا دخلت الانثى يطلعها بالضرب طبعاً كل هذا بسبب الرحلة المأساوية اللي مرو فيها اليوم اللي قبله ..

واطعمت الفروخ بالابره ورحت للعمل .. طبعا انا اتأخر في العمل يعني احيان من 8 الصباح الى 6 المغرب

وطبعاً هذا الوقت طويل على الفروخ بدون اكل .. لما رجعت من العمل كنت على أمل ان الزوج هدأ وأكل الفروخ ولكن للأسف لم يطعم الفروخ والوضع على ماهو عليه من سلوك الذكر والانثى ..

اتصلت بصاحبي وقلت له ع الموضوع واللي حصل وفكرت اني ارجع له الزوج ورحت له البيت ومعايا الزوج والفروخ فقال اذا تبغى بدله بأي زوج من الباقيين او بدل ببغاء او او ..الخ

وجلست افكر في الموضوع واشاور نفسي وافكر في الفروخ وخفت اني لو تركته عنده الفروخ ماتاكل وتموت ومايعرف يهتم فيهم لانه قال بحطهم مع زوج ثاني معاه فروخ وهم يأكلوه وبرضو حسيت انه شي غير مضمون ..

فبعد طول تفكير توكلت على الله واخذت الزوج ورجعت للبيت وعرضتهم في النت للبيع مع زوج اخر عندي وقلت اذا جاب سعر مناسب ولقيت شخص مناسب يرعاهم رح ابيعهم لكن للاسف مالقيت لا السعر المناسب ولا الشخص المناسب فلغيت البيع تماماً ..

وشلت الفروخ من عند الزوج وفصلتهم تماماً ومباشرة بعد فصل الزوج دخل الزوج للبياضه وبدأو يمارسو حياتهم عادي وانبسطوا وصاروا يدخلو ويطلعو والذكر لقح الانثى ماشاء الله وصاروا اغلب الوقت في البياضة ..

وبدأت أطعم الفروخ الصغيرة بنفسي واهتم فيهم ورحت اشتريت لهم انواع واشكال من الفيتامينات وانواع الخلطات للتغذية لأني ما اعترف أبداً بشي اسمه سريلاك للفروخ (كله سكريات ومايعطي التغذية المطلوبة) لما صحيت ثاني يوم الصباح وجلست افكر اش رح اسوي اذا جاعو الفروخ وانا في العمل فقررت أخيراً اني اخذهم معايا للعمل واخذ الابره والاكل وكل شي واذا جاعوا اعطيهم الوجبة في موعدها واليوم هو ثالث يوم يداوموا فيه الفروخ معايا في العمل وتم تعينهم على وظيفة قهوجي لاني حطيتهم في البوفيه حق الشاي والقهوة لانه أدفأ مكان في العمل كله..


ادري طولت عليكم السالفه ..

والحين مع الصور ..

هذي صورة الزوج ..

وهذي صورة الفروخ بعد تنظيف العش وحط النشارة اول ماجبتهم طبعاً قبل مايصير فلم عدم تأكيل الفروخ وقبل ما افصلهم عن الزوج ...






وهذي صور للفروخ وهم معايا في العمل بعد ماكبرو شوي خلال الثلاث ايام ولاحظوا الفرق ماشاء الله


اهم شي شوفوا وين حاطهم عشان ادخلهم العمل بدون احد ينتبه خخخخخخخ

هذا كيس باتشي حق العيد












وان شاء الله رح احدث هذا الموضوع بصور جديدة للفروخ الى ان يكبروا وايضاً تحديثات للزوج اذا باضوا قريباً او شي باذن الله ...


واعتذر على الاطالة ..

وبانتظار ارائكم وتعليقاتكم واستفساراكم

قلبته مطعم ومقترحاتكم :P

في امان الله

[Dark.Love]

ما شاء الله
ما شاء الله

زووج جمييل وفرووخ حلووه مرره
الله يحفظ لك الجمييع
وزين ماسويت انك تفصل الفروخ عن الزوج
صراحهً انقدت ارواح الله يحييك

ويارب الله يعطيك خير الزوج ويكفيك شره
وكذلك الأزواج الباقيه

الا بسألك
دوام الفروخ شفتات لو دوام طبيعي
اهم شئ كلم المدير يمشي لهم رآآتب
>> مزح ..

الله يوفقك
لك َ
. أجمل تحيهـ .

[fotoo]

مبروووووووك الانتاج
وتشوف عيال عيالهم
والله يوفقك

[الطائــر الغامــض]

ماشاءالله تبارك الله ...

والله جــوز وفراخ رووووعة الله يحفضهم ويكثرهم لك ...

وبصراحة كأني شايف الفرخ الأبيض ألبينــو ...!

مو متأكد بس ممكن لوتينــو ...

[نسايم الليل]

والله يالحن الكروان موضوعك هذا فرحني وأحزني في نفس الوقت

اسمحلي أقول إن صاحبك هذا عديم الضمير ، لو كنت مكانك كنت سمعته كلمتين عن حقوق الحيوان

يأخي هالناس كيف يطاوعهم قلوبهم على اقتناء حيوان " روح " واهمالها مثل ماذكرت ، كويس إنك اخذتهم منه ، على الأقل أنقذت زوج منهم ، والله يعين بقية الأزواج ، والله إنه راح يحاسب عليها يوم القيامة

تصدق إني مريت بتجربتك وورحت مرة الدوام ومعايا عصفورة صغيرة أكلها

انت عارف عصافير الدوري إلي نشوفها في كل مكان في الشوارع ، لما يجي موسم تكاثرها بعد الشتاء ، تبدأ الزغاليل تغادر أعشاشها وتتساقط على الأرض من الأشجار وأسطح البيوت بكثرة ، وما تقدر تطير

وعاد أنا ما استحمل أشوف عصفورة مرمية بالأرض وما أشيلها ، تعوت إني أكلها إلين ما تكبر وتعرف تطير بعدين أفتح لهم النافذة متى مايبغوا يطيروا طارو

مرة مديرتي في العمل لقت زغلولة في حوش بيتها ، أخذتها وجابتها لي ، وطبعا ما في أحد بالبيت يعتني بها ، فإضطريت أجيبها الشغل معايا يوميا على شان أكلها والحين بسلامتها كبرت وودعتني بداية رمضان ، " في حماية الرحمن "

بس في ملاحظة حلوة تذكرتها في تقريرك <<<<<<< إن السيريلاك ما ينفع للفروخ لأنها كلها سكريات

أنا لاحظت هذا الشيء فعلا ، لما كنت أغذي العصافير كنت أسأل هل ينفع لها ولا لا؟
كنت أحاول إني أذوب التمر في ماء ساخن وأعطيها الزغاليل بعد ما تبرد أو إني اطحن فواكة منوعة
ياريت تذكر لي وش تعتمد في تغذية الصغار أخي الكريم ؟؟

[عاشق الكوكتيييل]

ماشاءالله طيور روووعة وبالاخص الفراخ والفرخ الالبينو ماشاءاله رووووعة حافظ عليه والله يحفظهم لك من كل شر

[شبل العقيدة]

انت شخص رائع ....مبارك للمنتدى انك سجلت فيه

[عاشقة الظلام]

ما شاء الله عليك يالحن الكروان
مغامراتك حلوة مع هل زوج الروعة
والفراخ الاروع
والله بيجازيك خير الانك انتشلت هل زوج بفراخة من دمار كان محتم عليم
عموماً الله يحفظهم لك
وان شاء الله نكون من المتابعين لهذا الموضوع

[لحن الكروان]

المشاركة الأصلية كتبت بواسطة Dark.Love

ما شاء الله
ما شاء الله

زووج جمييل وفرووخ حلووه مرره
الله يحفظ لك الجمييع
وزين ماسويت انك تفصل الفروخ عن الزوج
صراحهً انقدت ارواح الله يحييك

ويارب الله يعطيك خير الزوج ويكفيك شره
وكذلك الأزواج الباقيه

الا بسألك
دوام الفروخ شفتات لو دوام طبيعي
اهم شئ كلم المدير يمشي لهم رآآتب
>> مزح ..

الله يوفقك
لك َ
. أجمل تحيهـ .

مشكوووور اخوي على ردك وتعليقك الرائع ..

ويشرفني كونك اول من رد على موضوعي ..

ولا تشيل هم المدير شافهم وقال بيعطيهم مكافئة كمان هذا الشهر عشان داومو اليوم معايا واصلا اليوم اجازة رسمية عشان بكره اليوم الوطني

عاد الفلبيني اللي شغال في البوفية يحبهم مرة طول الوقت جالس يلعب معهم وينتظرني لين اجي وقت الوجبه أأكلهم

[لحن الكروان]

المشاركة الأصلية كتبت بواسطة fotoo

مبروووووووك الانتاج
وتشوف عيال عيالهم
والله يوفقك

الله يبارك فيه ،، اللهم امين

مشكور أخي الكريم على مرورك وتعليقك ..

دمت بخير