من تجربتي في تربية طائر الكوكتيل

[hlwlw]

السلام علكم ورحمة الله وبركاته

حبيت أنزل لكم مجموعة من المواضيع من خبرتي البسيطة
في تربية طائر الكوكتيل والعناية به ...



طريقة عمل البيض بالبقسماط ... وهي وصفة مفيدة جدا للطائر خصوصا للانتاج
نحتاج بيض وبقسماط فقط
نقشرالبيضة ونحطها هي بالمحاحة في اللي يطحن يدوي
ونفتت البيض كامل عقب نحط كمية بسيطة جدا من البقسماط
ونطحنهم مع بعض حق ينخلطون في بعض وطبعا البديل موجود
وهي الخلطة الجاهزة egg food وطبعا مو شرط الطيور تاكله
لانه الشي على التعود واذا تبون تاكله شيلو الحب اليوم بكبره
وطبعا مو كل الطيور بتحبه في البعض يفضل الجاهز



الموضوع الثاني هو استحمام الطير



طبعا استحمام الطيور شي مهم جدا والمفروض يكون اسبوعيا بس
عن نفسي ماالتزم بوقت محدد متى ماحسيت الطير محتاج سبحته
ماعلينه . شلون نسبح الطير ؟
بعض الطيور تسبح بنفسها لو شافت ماي يعني مثلا لجانة صغيرة طاسة
مسبح صغير للطيور تقوم تسبح فيه وتنظف روحها
نجي لطيورنا الحلوة اللي ماتحب الماي حتى
كل اللي تحتاجه بخاخ ماي وطبعا تحصلون كل مكان وعشان اسهل عليكم
روحو محلات ابو ريالين او ربيتن هالاماكن متوفر فيه بقوة
ونحتاج قفص وشمس يعني لو بنسبح الطير يكون في الظهر
نخلي الطير داخل القفص ونرشه بالبخاخ بس ما نرش وجهه قد مانقدر ما يصيد الوجه
ونخلي الطير يتشمس بس مو معناته نصلخه في الشمس ترى نجففه مو نشويه
حاولو ماتخلونه في الشمس خلوه في الظل بس قريب منها اهمشي مايكون فيه
هوا بارد يلفحه ويمرض
وشي مهم الشتاء ممنوع الطير يسبح


ننتقل للأمراض

أكثر الامراض انتشار وخطورة وقد يؤدي للموت


مرض الدمعة
خمول واضح في الطير مع العطس وصوت في التنفس وأوضح اعراضه احمرار العين وانتفاخها مع افراز الدموع
العلاج
قبل أي علاج يجب عزل الطير عن باقي الطيور وأن يراعي المربي النظافة التامة لقفص العزل وأن يكون العزل في مكان
ثابت درجة الحرارة وعدم تعرض الطير لأي تيار هوائي
يوضع للطير مضاد حيوي في الماء وان يكون الماء نظيف تمام ويفضل غلي الماي
علاج العين : تنظيف العين ثلاث مرات يوميا بقطن وماء دافئ ومباشرة بعد التنظيف يوضع كريم العين الخاص بالطيور
أو البشري
اليمين بيطري اليسار بشري والبشري مفعوله اقوى وأسرع


وهذا المرهم بعد مفيد




المرض الثاني واللي يتهاون فيه الناس لأنه العلامات تكون غير واضحة
وممكن يعيش الطير ل6شهور بعدها يموت




مريض الضَعَف أو ( السكيِّن ) : يظهر الهيكل العظمي للطائر المُصاب بارزاً ، و خصوصاً عظمة مفرق الصدر حادة كالسكين ، و ذلك في المراحل المتقدِّمة ، و عند ازدياد الإصابة يحدث الشلل و مِنْ ثَمَّ الوفاة ،
سبب هذا المرض : ديدان حلقية مستديرة بالإضافة للديدان الشعرية ، و هي ديدانٌ مُتَطَفِّلَة ٌ ، تلتصق بجدار الأمعاء الدقيقة المخاطي ، ثُمَّ تمتصُّ الغذاء الجاهز المهضوم لتتغذى به هي ، بينما تترك فضلاتها داخل أمعاء الطائر المُصاب ، فتُسَبِّبُ له الخمول و الضعف مع الإسهال ، و يَخِفُّ وزْنُهُ كثيراً ، و لا يقوى على الحركة إلا بالكاد ، و يظهر الفحص المجهري لبراز الطائر المريض الأطوار المعدية للمرض ، و يتمثّلُ الحلُّ في عزْلِ الطائر المُصابِ و من ثم يعطى كبسولات ( أسكابيلا Ascapilla) لأنها تقضي على كل أطوار الديدان ، بما في ذلك الطيور السليمة للوقاية ، يجب تطبيق إجراءات الوقاية بصرامة ، كالنظافة و التطهير بشكلٍ دوريٍّ بما في ذلك استخدام أنبوب اللّهَبِ ، و تقديم فيتمينات مُذابة في الماء ، لتعويض ما فقدت الطيور المريضة من أغذيةٍ


الموضوع يتبع بنزل مواضيع تربية الفروخ الصغيرة .



تربية فروخ الكوكتيل تربية فروخ الكوكتيل موشي صعب بس بعد مو سهل بالنسبة للمبتدئين
عن نفسي لا اوافق بشدة على شراء فرخ غر بالنسبة لشخص ماعنده اي خلفية
عن طريقة الغر وطريقة العناية بالفرخ وفي النهاية الطير بيموت ولكن لاحظت ناس واجد
يشترون وعقب يتورطون عشان جدي حبيت انزل هالموضوع

نجي لعمر الفرخ
الأفضل للتربية الفرخ اللي توه بادي يريش يعني لحد ياخذ واحد كلش مافيه ريش واغلب الناس
للأسف تبغي تكسب وقت للتفريخه الثانية فتشيل الفروخ وهم صغار بدون ريش
وبخصوص الشتاء لحد ياخذ فرخ بدون ريش ويفضل عدم تربية فرخ غر في الشتاء
مواصفات الفرخ لازم يكون متعود على الغر (العس) يعني لا تاخذ فرخ توه شايلينه
من اهله لانه مايفهم انك قاعد تبي تغره لكن اللي متعود على الغر ما بتحصل اي صعوبة
ولازم يكون نشيط وشهيته مفتوحة وما يكون ضعيف وتعبان ودايخ ويفضل يكون نظيف
قبل الشراء لازم يتوفر عندك قفص وعلبة تكون داخل القفص وتكون مفروشة بقش (نشارة خشب )
غر الكوكتيل :
بدون ريش كل 6 ساعات يعني 4 مرات في اليوم
عقب ما يريش 3 مرات في اليوم
ولين اكتمل الريش كامل مرتين
عقب نبدأ نخلي في القفص الماي والاكل ونغر الطير مرة وحدة بس
ولازم نخليه في مكان مايشوف احد عشان يبدأ يفقد الامل في الغر ويحاول يكسر الحبوب






مرحلة غر الفرخ
أصعب مرحلة في العناية منها نحدد إذا الفرخ بيعيش أو يموت
في البداية صعبة ولكن اشوي اشوي تتعود ويكون الشي روتيني مثل شرب الماي
أول ما تاخذ الفرخ تسأل راعيه متى آخر مرة غريته ؟ وتحسب عدد الساعات
مثلا اخذت فرخ عمره 3 اسابيع ( بدون ريش يكون) الساعه 4 وقال لك انه غراه الساعة
2 راح تحسب يعني بيكون غرك للطير الساعه 8 .
قبل الغر جهز الأغراض :
أبر الغر 2 وكلينس وقلاص فيه اشوي ماي
طريقة عمل السيريلاك :
مافي دافي (ماء صالح للشرب) تخليه في قلاص
وتضيف اشوي سيريلاك وتسوي خلطة خفيفة مو ثقيل ولا كلش خفيف
كل ما يكبر الفرخ كلما لازم تزيد كثافة الخلطة وعقب تسحبها بالابر
الأبر موجودة بمحلات الطيور
تتأكد أنه السيريلاك مو حار على الطير وبجذي كل شي جاهز
تجيب الفرخ وكبداية بعض الفروخ بتمثل عليك انها تهجم وانه امو جوعانة
بسبب الخوف طبعا
تاخذ اشوي ماي بصبعتين وتبعد الريش عن المنقار عشان ما يلصق فيه الاكل او يتوصخ
واول مرة تغصب الطير حق يتضوق الاكل وعقب بيقعد يصيح حق تغره
عن نفسي ما احط مقدار معين في الابر يعني لين الطير يشبع اله اذا حسيته كلش انتفخ وبعده يصيح
فاحقره واعتبره اخذ كفاية
عقب مايخلص وجبة السيريلاك اعطيه اشوي ماي نقطة بس حق ينظف حلقه عن بقايا الاكل
وانظف منقاره بالكلينس واخليه يصير نظيف
طريقة الابر ماتكلمت عنها لأنها تحتاج شرح فيديو ولأنه فيها يمين ويسار
اكتبو في اليوتيوب طريقة غر فروخ الكوكوتيل أو
cockatiel hand feeding
وتعلمو الطريقة زين لأنه اذا عكستون راح توصلون الأكل لمجرى التنفس وبيموت الفرخ
ملاحظة : لحد يستخدم عود لأسباب عديدة أكثرها خطورة لما يبلع الفرخ العود صارت فيني وفي غيري


غر الفروخ (3) الشرح المبسط

نجيب ماي وكلينس وابرة الغر تكون دافية
لانه باردة مابتعجب الفرخ وبيظل جوعانة وحارة بتحرقه
اول شي نباعد الريش بالماي عشان مايتوصخ الطير
وبعدها نغره اشوي اشوي مو كامل على بعض
والافضل نغر واحد واحد لانه اذا فرخين جواعة يربكون الواحد
المهم بعد مايشبع الطير تنظفه بشوية ماي وكلينس عشان
يبقى نظيف وبعيد عن الفطريات .

الرابط لفيديو توضيحي للغر

http://distilleryimage0.s3.amazonaws...d3f144_101.mp4


طريقة الكشف عن البيض

وجود البيض الغير ملقح تحت الزوج لمدة شهر قد يتعب الزوج
دون وجود نتيجة نهائية لذا يفضل الفحص لتجنب ارهاق الزوج بالجلوس على البيض

يوجد مصباح متخصص لفحص البيض وهي في العش دون الحاجة للمس البيضة
او حملها خارج العش

عن نفسي استخدم فلاش التلفون تحتاج غرفة مظلمة والفلاش
نحمل البيضة بحذر شديد وونخليها فوق الفلاش

ملاحظة : البيض يفحص بعد عشرة ايام للاحتياط مع انه ممكن تشوف نبض الجنين
بالايام الاولى بس الاحتياط واجب

الصورة تبين بيضة غير ملقحة



جنين ميت



جنين بعمر ايام



اللون الاصفر لا يعني بيض غير ملقح

الدليل في الرايط

فيديو يوضع نبض جنين بعمر أيام


http://distilleryimage10.s3.amazonaw...4fe0f6_101.mp4

[مربي -حيوانات]

شكرا على الموضوع الجميل

[Bagz]

موضوع جميل ومجهود رائع اسمح لي أسجل إعجابي الشديد
وانتظار الجديد

[ادمنت قربك]

اهنيك ع ابداعك وسهوله شرحك
الله يسعدك ويبارك فيك

[الاليفه]

ما شاء الله موضوعك مميز جداً ..
إن شاء الله يستفيد منه الجميع

[The male nurse]

بارك الله فيك

موضوع من واقع خبرة و تجربة و مجهود شخصي تشكرين علية

تستحقين الختم و التقييم و بكل جدارة..

استمتعت بقراءة الموضوع و استفدت منه

واذا كان هناك تكملة للموضوع ادرجيها وسوف يتم دمجها مع الموضوع
--

تقبلي مروري

[عكروشة]

مشكور على الطرح الرائع انا مش من هواة الكراون

[أسيــــر]

ماشاء الله
تسلم يمينك على الموضوع

[شرقــــاوي]

مـوضـوع غـايـه بالـروعـة
ويـحـمـل الـكـم الـكـافـي مـن الـمـعـلـومـات والـشرح الـمـدعـم بالـصـور
بـصـراحـه لـو لـم يـكـن اخـي The male nurse سـبـقـنـي بالـخـتـم والـتـقـييـم
لـكـان لي شـرف الـتـقـييـم وخـلافـه

الـف شـكـر عـلـى هـذا الـمـوضـوع
وأشـتـقـنـا للـمـواضـيـع عـلـى الـنـحـو ذاتـه ....

[أبو طيف]

يعطيك ألف عافية موضوع يستحق التميز ويستحق المشاركة

سهل على المبتدئين والباحثين عن إجابات

تحية وشكر لكي ...