انا مش شايفه غير التقليد ف البلاد العربيه..فين اقدر الاقي الاصلي ..

[مناار]

ازيكوا حبايبي .. عاملين ايه..

انا عاوزه اجيب كلب.. هو الحقيقه بالنسبالي ميطلقش عليه اللقب ده .. هو بالنسبالي حياتي.. وغالي عندي قوووووووووووي.. لانه من دلوقتي ساكن جوايا وعشقه وغلاوته وقربه من قلبي ومني ميتوصفوش..

وطبعا بما اني باكره الكلاب كره العمى.. هيعدي سؤال بديهي امال ازاي اللي حصل ده ؟؟

انا مش عاوزاه كلب زي الكلاب بنت التيت اللي بنشوفها ف الشارع ( اللي هي الحجم الكبير )..انما عاوزاه صغير.. زي الجريفون واللولو..

وانا اعرف طريق جريفون 45 يوم ب 300..

ولولو شهر ب 250.. متتخضوش م الاسعار انا من المعادي واقل لولو هنا ب 800.. واقل جريفون 500..بس عشان هما من اماكن معرفه..

في خضم ذلك عاوزه اسالكوا كام سؤال عنهم.. وانا عارفه ان في هنا ناس فاهمه ف الانواع كويس..

1- انا عايزه اعرف الفرق بالظبط بين الاتنين لما يكبروا.. شكلا..لذلك اللي يجيبلي صوره للاتنين وهما كبار يبقى مشكورا..

2- اطلع ازاي من مطب هجين.. انا مش عاوزه حاجه هجين مثلا لولو على جريفون .. او لولو على اي حاجة تاني.. ده غير ان في ناس شايفه ان اللي بيطلق عليه لولو ف مصر ده مهواش لولو ده هجين من فصائل عده.. وان مفيش فصيله بعينها اسمها لولو اصلا هل ده صحيح؟؟ كذلك الجريفون.. بيقال ان الجريفون الاصي مش ف مصر انما هجين..وانا شفت الجريفون عالنت حاجه ملهاش علاقه بالجريفون اللي بشوفه ف المحلات خالص .. بل ضخم عنه جدا ..


واضح ان شكله كبير.. بالرغم ان الجريفون هنا .. اصغر منكده بكتيييييير
هو ده الجريفون هنا

.. ده يعني ايه؟؟ ان كللللللللللل الجريفون هنا مهجنين؟؟

طب ده لو كان صحيح.. يبقى ايه شكل الجريفون الاصلي(هل هو اللي ف الصوره ده ولا حاجه تانيه) لو مش هو ياريت حد يرفعلي صورته.. انا عايزه السلاله الاصليه..فعايزه اعرف لما اشتري اي نوع من الحجم الصغير اتاكد ازاي اذا كان اصلي او غيره.. وده هيتم بمعرفتي بشكل جميع الانواع صغيرة الحجم..الاصليه..
وهل فعلا الاصلي افضل م الهجين ولا ماتفرقش ولو افضل افضل ف ايه.. وهل صحيح زي ماسمعت انا الهجين له مساوئ بالذات لما بيكبر؟؟

3- طبعا اي كلب بيبقى منه انواع وجنسيات..زي مثلا الجريفون بيبقى منه الفرنسي وجنسيات تانيه.. انا عايزه اعرف اشهر جنسيات وانواع الاتنين.. وهل صحيح في جنسيه افضل من غيرها.. زي ماطالع اشاعه (الله اعلم عن مدى صحتها) ان الجريفون الفرنسي افضل نوع؟؟

4-اضمن منين ان لما اشتري كلب تبقى صحته كويسه (غير كلام اللي بيبيعهولي لانه غالبا بيبقى فشنك)..؟؟

5- ايه صفات اللولو وايه صفات الجريفون؟؟ سلوكيا وجسديا (اذا كان في ضفات مميزه لكل منهم).. مثلا مين اللي بيتلقى التدريبات اسرع ؟؟ مين ازكى..ولا كله برتقال على راي سلطان.. وايه الفرق بين نمو ده والتاني.. ومين اللي شعره اكثف..يعني معلومات عامه عن كل واحد..


6- قولولي ايه رايكوا ف الاسعار اللي قلتها.. ومن الاخر كده .. ايه الاسعار الحقيقيه بتاعة الانواع دي؟؟


7- انا عاوزه صور لكل انواع الاحجام الصغيره الاصليه البيضا.. فياريت حد مشكورا يرفعهملي.. عشان اعرف الفروق والانواع لاني عارفه ان اللي ف مصر مش اكتر من عك واستهبال التجار..

8-......لا خلاص كده...

اتمنى تكون اسئلتي لها اجابات شافيه.. واللي يجاوبها ربي يسلمه يارب ومكنش تقلت عليه..

يالله اشوفكوا على خير ياحبايبي .. منار