فرررررروخ الدررره ..... كلها امراض وتمووت... ايش الحل؟؟

[فلونه]

معقوله فيه ناس كذا !!!! مايخافوا ربهم

على كذا ليه التجار يستوردوا الفروخ هذي

اذا كانوا يعرفون انهم يعطوهم الابر هذي

ويستوردوها!!!!

لا حول ولا قوة الا بالله

ايش ذنب الطيور هذي ...

الفروخ اللي عندي باقي منها واحد وشكله حيموت

صحيح اول ما جبتهم كانوا يصارخوا بقووه

ونشيطين جدا جدا ...وكنت مستغربه

لانهم ضعاااااف مرررره وتقريباا هياكل عظميه

وحوصلتهم فااااااضيه مررره

وبرغم كذا فيهم نشاااط وقوه

وبعد يومين بدأ عليهم الخمول ورفضهم للاكل

_________________

ليه مافيه احد يكلم التجار وينبههم

وبالنسبه لي انا

ماراح اسكت

والله يقدرني على فعل الخير

[Raize]

المشكلة مو بس في الطيور المستودرة من الخارج، حيث إن أغلب أصحاب المحلات لدينا في مملكة البحرين لا يتعاملون مع الطيور المستوردة وخاصة الفروخ منها بشكل سليم، حيث لا يوجد هناك اهتمام بالأكل ولا النظافة ولا الجو المحيط، حيث يقوم بعضهم بوضع الفروخ في مكان بارد جداً، ومن تجربة شخصية فإني قمت بشراء فرخ درة نيبالي مستورد وبقى لدي 3 أيام فقط ومات، وقمت بعدها بشراء الدرة الهندية وأيضاً مستوردة ولكنها كانت بصحة جيدة، ووُفقت فيها، حيث أنها كبرت وبقيت لدي أسبوعين وهي بحالة ممتازة وكانت قد اقترتب من الفطام، ولكن قامت ببلع قطعة أكل كبيرة وانخنقت للأسف وماتت..

وبناء على ذلك، فإن المسئولية تقع على عاتق الجهات التي نستورد منها هذه الطيور، بالإضافة إلى أصحاب المحلات..

[الآسطورهـ]

المستورديـن ماعندهم ذمه وضمير

اهـم شي عندهم المكسب المادي

وحنا مع الاسـف نشتري اي شي رخـيص

افضل شي انتاج البلد ,, صح انه غالي حبتين لكن سعره فيه

[legend Boss]

والله صادق الاسطوره مو مشكله الفلوس المهم انك تشوفه يكبر معاك وتربيه وتنبسط معاه

بس المشكله كيف تعرف انا الفروخ مستورده ولا من عندنا

وانا والله كنت باشتري في دي اليومين فرخ بس بطلت وشكرا على الموضوع والتنبيه يا فلونه

[bahraini.forever]

مرحبا

احنا عندنا في البحرين نازله كمية كبيرة من فروووخ الدره

وفي منها المريض ومنها السليم النشيط ...

بس على الواحد قبل لا يشتري يفحص الطير زين عشان يتأكد من سلامته...

أنا سألت العامل الاسيوي الي في المحل .. قلت له هذي الطيور من وين تجي .. قالي أنها تجي من دولة قطر
حيث انه عندهم هناك مصانع كبيره لهذي الطيور ...

أنا لاحظت ان صحة الطيور تختلف من محل الى محل ...

[الآسطورهـ]

اخوي legend Boss

بالشكل ماراح تعرف انه بلدي ولا مستورد

البلدي نادر مايجي بالسوق

الافضل تسأل شخص خبره وعنده ذمه ..

اخوي bahraini.forever

الطيور من اول نظره وثانيه نظره مافيها شي ونشيطه

لكن بعد فتره "كم يوم" يتمكن منها المرض وتتعب ,, ويبيّـن الخافي

[noor999]

بالنسبة لي انا راح اتكلم عن شيء مقارب للموضوع بحمد الله ونعمته نزلت السوق وشريت فرخين درة ولكن شريت فرخ من شخص والثاني من شخص ثاني يعني مو من نفس المجموعة وبعد فترة اسبوعين الاول سوى اضراب عن الطعام وصار خامل ما يتحرك يشوفني يناديني ولما ااكله يرفض المهم انا عندي علاج اسمه تايلن والخاص بالجهاز التنفسي ومرض الكوسيديا الله يبعده عن كل غالي لكم طبعا قلت بجازف واشوف حل للموضوع صرت اخذ نص مل بالابرة من العلاج مخفف بباقي الابر بالماء واعطيه مل واحد خمس مرات باليوم والاكل اغره غصب لانه لو ما اكل بيموت المهم على هذا المنوال لمدة 3 ايام وبعد الثلاث ايام اعطيته مضاد للديدان و البكتيريا مع بعض لمدة يومين وبعدها الحمدالله صار الطير بأحسن صحة ولكن يجنني يتشهى الاكل لا شافني اكل موز سوى فلم عشان اعطيه يموت بالموز واي شيء يشوفني اكله يبي منه المهم هذا الطير الاول اما الثاني جاه مشكلة بالجهاز التنفسي وصار يخرج افرازات من مجرى التنفس وخامل جدا واكله قليل طبعا حالته احسن لاني ما اغره لا غصب ولا طيب اعطية الملعقة ياكل منها ونفس العلاج ونفس الطريقة والحمدالله صار مثل اخوه عال العال الى يومكم هذا طبعا هم درة لونهم اخضر وبعد فترة اسبوعين اشتريت درة اصفر فرخ لحمه الريش بالكاد يغطيه المهم انه خواف جدا دايم راسه تحت اي شيء ولو ما في شيء يدفن راسه بنشارة الخشب والاكل بالغصب ما ياكل و مجنني وصاري معه اللحين 3 اسابيع اعالج فيه واغره غصب ولحد اللحين ما تحسن وضعه يلعب نشيط لكن اكل ما ياكل لا من ايدي ولا بالحاله واتركه ونفس الشيء طبعا جسمه بدى ينحل والله يستر بحاول وماراح اييأس لين يضبط وضعه اتمنى اني اكون افدتكم ولو بالقليل من المعلومات ونطلب الدعاء بالخير ودمتم سالمين.
اخوكم ابو شيخة

[ابو سفر]

افضل شي الانتاج المحلي

انا درتي والله وهي فرخ اخليها تنام معاي بالغرفه المكيف بادرد مثل الثلج وماشاءالله ماعليها خلاف تصحيني في الصباح بتصفيرها

[noor999]

احب ابلغكم ان الدرة الصفراء صارت على خير ما يرام وبصحه ممتازة جدا بعد المضاد اللي اعطيته ايها و بالعكس تغير فيه اشياء كثيرة مثل انه صار ما يخاف ويطلع على اليد من حاله وانفطم من نفسه صار ياكل حبوب دوار الشمس وبصراحه انا ما كنت متوقع كل هذا التقدم يجي مرة وحدة اليوم انبسطت يوم جيت من الدوام حصلت الطير برا القفص ياكل من حاله حبوب دوار الشمس ويوم شافني ولا هو معبرني مكمل المشوار جيت جنبه وبرضوا ولا معبرني مديت يدي له وناديته ركب على طول اخذته بجوله مكافئة له ورجعته القفص وراح على طول يكمل اكل داخل القفص هذي المرة وبصرحه انا اقول مع قوة الاراده لا يوجد مستحيل ابدا فوض امرك لله رب العالمين و توكل عليه وان شاء الله ما راح يصير الا كل خير باذن الله والواحد الاحد..
وتقبلوا مروري اخوكم ابو شيخة

[MR.coOol]

بالفعل احنى بعد بالبحرين عندنا اكثر المحلات فروخ عندهم مريضه وخملانين ..

ولكن جفت كم محل عندهم طيور صحتم ممتازه ونشاطهم عالي .. حتى شريت لي فرخ صغير حق بنت خالتي

والحمدالله للحين عايش ..

.........

ولكن انا بعد اصحابي شترو فروخ من نوع نيبالي كلهم ماتو ..

الحل الوحيد تشترون تفريخ محلي من بيوت

لان في بعض المربين ينتجون في بيوتهم ويبوعون ..

انا الحمدالله اذا بشتري فروخ اكثر شي اخذ من المربين المحلين الي ينتجون عندهم