سوبي صديقي العزيز المريض ..

[بشورة]

السلام عليكم...

عدت لكم بعد غياب هههه عائلة الطيور عندي كبرت جدا وصار فيها الكثير من التغييرات.. قبل شهرين كتبت موضوع جلست بالكتابة والتنسيق اكثر من ساعتين ولما ضغطت ارسال كان النت مقطوع وراح كل شيء.. فما رجعت كتبته

لكن هذا الموضوع سأكتب به فقط عن صديقي العزيز..

.........

قبل شهرين فقست عندي اربع بيضات لكوكاتيلاتي

اصغر فرخ كان حجمه صغير كتير كنت مسميتو نيلز .. عمره وصل اسبوع وحجمو كإنو هلأ فقس من البيضة.. ومات للأسف,,

الفرخين الاول والثاني سليمين وجميلين .. ماروو وتومي ...

الفرخ رقم ثلاثة هو سوبي..

اول اسبوع كان سوبي سليم تماما وما لاحظت عليه اي شيء خطأ..

لما صار عمره اسبوع .. لاحظت رجله اليمين فيها شوي كساح.. بالبداية ما حد صدقني ففكرت اني غلطانة عشان مو دائما تبين ><

بعد أيام ..

صار في فرق كبير بالحجم بينه وبين اخوته ماروو وتومي مع انه الفرق بينهم فقط يوم

ماروو وتومي كبر حجمهم طبيعي .. لكن صغيري سوبي ظل حجمه صغير وما كبر..

ظهر سوبي بلش يصير فيه تشوه من الكساح اللي برجله وكان الوقت مر خلاص انه يتعالج .. جربت اربط رجليه بس ما قدر يصمد اكثر من خمس دقايق اكيد توجع كتير.. ففكيتها...

صار عمر ماروو وتومي وسوبي شهر .. تومي وماروو اكتمل الريش طبيعي لكن سوبي ظل حجمه بحجم كوكاتيل بعمر اسبوعين .. ظهره وتحت جناحه وبطنه ما عليهم ريش وذيله قصير جدا جدا .. وهضمه بطييييييء جداً..

بدأ اخوته ماروو وتومي بأكل البذور وتخلو عن الاكل اللي بطعميهم اياه..

لكن سوبي ما يقدر يعض على شيء وضعيف جداً... حتى المشي ما يقدر يمشي.. فكنت اخلي تومي وماروو يلعبو براحتهم وأحمل سوبي وأمشي فيه بكل مكان وأضل اكلمه وأورجيه كل مكان

في احد الايام صحيت ولقيت سوبي بطرف العش ضامم نفسه وما بيتحرك ... حطيت ايدي عليه فكان سوبي بارد مثل الثلج .. حملته وصرت اكلمه لكن ما في استجابة .. فكرت سوبي مات خلاص وبدأت بالبكاء .. فجأة حرك راسه شويه ورجع نزلو .. صحي اخوي وتفاجأ من حالتي .. اخد سوبي وراح للدكتور..

رجع بعد فترة وكان سوبي بلش يستعيد عافيته .. وقال انه كان بردان .. اكتشفنا انو اخوتو بطلو ينامو جنبه فبرد وهنا بدأ شغل الدفاية بالعش هههه

لاحقا...

ماروو .. تومي بلشو يطيرو .. لكن سوبي لسا بحجم اسبوعين لكن الفرق الريش كتر شوي .. بس لسا تحت الاجنحة والظهر والبطن بدون ريش...

لكن ما عندي مشكلة عشان سوبي صار صديقي العزيز

طول اليوم انا وهو سوا

اطلع اتمشى معو .. نغني ننط ننام نتأمل .. حتى الشغل والدراسة .. كلشي نسويه انا وسوبي

حاليا سوبي عمره شهرين لكن لسا حجمو صغير كتير

معو تقزم يعني حجمو صغير .. وظهره متشوه .. وما بيقدر يمشي.. رجله اليمنى فيها كساح.. وحركته قليلة .. ما يقدر يطير .. مافي ريش تحت الجناح او الظهر او البطن .. ما بيقدر ياكل لحاله اي لقمة .. حتى الوقوف ما بقدر عليه .. ذيله طالع بشكل مائل ولفوق مثل الطاووس بس ذيله قصير .. ودائما يزقزق بدون توقف.. لكن سوبي بنظري اجمل طائر وما بتخيل اي يوم بدونو .. مستحيل اطلع من الدار قبل ما ياكل وأصبح عليه .. ولما برجع بمسي عليه وبيضل معي لحد ما يجي الليل وقت النوم .. الأكل خمس مرات باليوم ^^ .. بحطله خلطة الغر وبخلط معها فواكه مهروسة..

يحب ينام عليي .. يعني فرشته هههههه .. اغلب النهار وهو معي يرتاح وينام .. وما بيرضى ينام الا لو كان ماسك اصبعي برجله او اني حاطة يدي على ظهره

للأسف ما عندنا عيادات بيطرية متخصصة لهيك ما في مكان اقدر اخده عليه للفحوصات والعلاج

صور جميلي سوبي .. متربع بقلبي





رجله وهو نائم .. بس بده يضل ماسك اصبعي







ما شاء الله
















سوبي جميلي اللطيف .. بعيونه أرى كل شيء جميل.. ولحظاتي أجمل معه .. اتمنى من كل قلبي ان يشفى وأراه يعتمد على نفسه.. لكن مهما احتاج ذلك من الوقت فأنا سأظل بجانبك يا صديقي العزيز