أنثى الحمام عندما لا تبيض .. لييييييش ؟!

[abu hasan]

السلام عليكم

يقال عندنا في الأردن طيرة مريّحة أو الطيرة ريّحت!!!

أمر طبيعي انها تكون الطيرة (أنثى الحمام) شغالة وبعدين تتوقف لفترة .. لإنه حسب معلوماتي بكون البيض داخل الطيرة على شكل عنقود سبحان الله (يعني زي الدجاج مع الإختلاف طبعا في آلية وضع البيض والتفريخ) ويجهز البيض بالتدريج لتضعه الأنثى على شكل بطون متتالية .. ولما يخلص عنقود البيض تتوقف الأنثى لفترة (بتريّح) لغاية ما تربي عنقود جديد وتبدأ بوضع البيض من جديد .. هذا ما أعتقده وقلت إنه أمر طبيعي

لكن ما هو غير طبيعي وقد حصل معي عدة مرات في السابق ولغاية الآن .. أن تشتري جوز حمام أو أكثر لتفاجأ أن الطيرة ما باضت وينتظر المربي عدة شهور ليكتشف أن هذه الطيرة لا تبيض .. وأكيد أنه شيء مزعج ومحيّر للمربي

وعلى سبيل المثال .. اشتريت طيرة بوز (دمشقي) من السوق منذ 6 شهور تقريبا على أساس إنها شغالة وزوجتها لكنها ما باضت وبعدين بدأت تغيّر ريش فقلت يمكن هذا هو السبب لكن صارلها مخلصة قلش 3 شهور وبرضه لسة ما باضت وكمان اشتريت مجموعة جواز مراسليات من 5 شهور تقريبا لكن في طيرة مراسلية ثوب قراقطة (سلفر) ما باضت لغاية الآن في حين إنه باقي الطواير من هاي المجموعة كلهن باضن .. وطبعا كل الطواير تعيش في نفس البيئة وتحصل على نفس التغذية والأدوية والتحصين .. والمشكلة إنها أحلى وحدة فيهن وطيرة البوز كمان بتجنن

فيا ترى هل هذه حالة مؤقتة وما هو سببها وعلاجها؟؟ ولا مثل هاي الطواير تعتبر عقيمة!!!! يعني كانت شغالة وبتبيض بشكل طبيعي بعدين صارت عقيمة طيب لييييييييش ؟؟!!!

في كمان موضوع متصل وبرضه محيّرني مع إنه والحمد لله مش صاير عندي .. لما بكون الفحل (ذكر الحمام) ما فيه كبسة أو كبسته فاضية (يعني بلقح الطيرة لكن بطلع البيض غير مخصب) .. هل هي حالة مؤقتة أم دائمة؟! هل هي مرتبطة بتقدم السن فقط؟! أم أن هناك أسباب أخرى؟! وما هو العلاج

أرجو أن تعذروني للإطالة وكثرة الأسئلة لكن مثل هاي الأمور فعلا مزعجة ومحيّرة وأتوقع أنها تثير تساؤل الكثير من المربين .. وأتمنى أن أجد عندكم الإجابات الشافية حتى يستفيد منها الكل

تحياتي للجميع