اول موضوع ليه في المنتدي يا ريت تساعدوني

[موري *]

اولا السلام عليكم انا جالي جوز زغاليل حمام هديه وانا عمري ما ربيت حمام او اي طائر في حياتي
بس سبحان الله في حاجه جوايا خلتني عايزه اربيهم بدل ما ادبحهم ودلوقتي انا عايزه راي الخبراء علشان مقصرش في حقهم انا حطاهم في كرتونه كبيره وحاطه عليها درفه سلك ومن الجنب خرمتها خرمين بفتحهم بالنهار واحطهم في البلاكونه وبليل بدخلهم الشقه علشان الدنيا ساقعه اوي عندنا في مصر واقفل الاخرام مفيش غير درفه السلك الفوق الكرتونه وباكلهم دشيشه ودره عويجه وغله هما يا دوب لسه بيعرفوا ياكلوا وبغير المايه مرتين او تلاته في اليوم وبحط الاكل 6 صباحا واسيبه معاهم وعلي الساعه اربعه العصر وبليل علي الساعه عشره وبغير تحطهم ورق جرايد من مرتين لتلاته في اليوم عايزه اعرف بقي 1> انا بعملهم بيت من الجناب سلك والباقي خشب تقريبا 40 في 40 او اكتر كافي ولا لا وهيحتاجه ايه تاني 2>انا كنت باكلهم دشيش بس ولما جبت غله ودره عويجه كمان لاحظت ان البراز لونه اغمق ده من تغيير الاكل ولا حاجه تانيه 3>بليل بسمع صوت خارج زي اخراج ريح ممكن يكونوا عيانين 4>هما بقالهم 5 ايام عندي المفروض اني ابدا اخرجهم امتي وطبعا حرام عليه لو حرمتهم من الطيران بس انا في بلاكونه دور اول علوي هيعرفوا يرجعوا ولا لا5>ايه الفيتامينات المفروض احطها وكل اد ايه 6>نتف الريش احسن ولا لزقه في مرحله التعرف علي المكان 7> في تطعيمات المفروض ياخدوها ولا لا 8>انا سمعت اني علشان احسن السلاله بلاش موضوع تزاوج الاخوات هل ده صح ولو كده تنصحوني اجيب من دلوقتي جوز ادهم ولا استنا يكبروا ولو هجيب احط الاربع حمامات مع بعد لحد البلوغ ولا ايه وشكرا ليكم مقدما واسفه اني طولت عليكم بس انا خايفه اخد زنبهم لو قصرت معاهم

[موري *]

معلش يا جماعه يا ريت الرد يكون مفصل لاني زيرو ومعنديش اي خبره في تربيه الطيور وجزاكم الله خير

[رائد ملكاوي]

اهلا وسهلا فيكي بقسمنا قسم هواة الحمام واليمام

أختي العزيزة يا ريت مرة تانية تبقي تطي سؤالك بالقسم الفرعي سؤال وجواب واللي تلاقيه تحت قسم واة الحمام واليمام

المهم بالنسبة لأسئلتك
انا معرفش امكانياتك المادية علشان تعملي ليهم بيت، لأنه الكرتونة مش هتنفع ابدا واللي انتي عاملاه دا مرحلة مؤقتة ومكان مؤقت

فلو امكانياتك سمحت وانتي عاوزة تربيهم بقصد الانتاجوتكتريهم، يبقى لازم تعمليلهم بيت على السطح، وتقدري تزيدي عددهم، ولو ما ما فيش امكانية وعايزة تربيهم في البلكونة يبقى تعملي قفص وأقل شيء ممكن انه يكون طوله 70سم، وعرضه 60 سم وارتفاعه 60 سم ودا تعمليه عند النجار.

بالنسبة للأكل فهو كويس اوي، وبالنسبة لتغيير الميه ما في داعي لتلات مرات في اليوم، تقدري مرة وحدة في اليوم أو بعد ما تتوسخ.

ازا الزغاليل بيقدروا يطيروا، لازم تربطي اول 5-6 ريشات بلاصق اللي يستخدمو لأسلاك الكهرباء
تفتحي كل جناح وتلفي باللاصق على الريش بعد ما تقربيه من بعضه وتعملي لفتين عليهم، وتكرري على الجناح التاني، وتسيبيه مدة ثلاث اسابيع تى يتعرفوا على المكان بعد ما تخليهم يطلعو برى القفص
وبعد كده فكي اللاصق وما تخوفيهمش وسيبيهم براحتهم لكن لازم تحطيلهم الكل برا القفص خلال فترة التلات اسابيع دول
بالنسبة للفيتامينات تقدري تشتري من الصيدلية البيطرية كيس فيتامينات وتحطي بطرف المعلقة بتاعة الشاي، وتدوبيهم بـ (200سم) مية يعني تقريبا مقدار كوباية مية اللي تشربي انتي فيها، ودي كل اسبوعين مرة لمدة تلات ايام متواصلة

وتقدري تعملي حاجة تانية انك تجيبي خل تفاح وتحطي 1سم على كوباية المية مع سنتين توم تدقيهم كويس وتحطيهم كمان مع المية وايضا كل اسبوعين مرة لكن يوم او يومين بالكتير

المطاعيم بقى تشتري مطعوم النيوكاسل وده بيحميهم باذن الله من مرض الصرع او ما يسمى الباراميكسو فيروس ويفضل انه تديه ليهم بفترات تغيير الجو يعني بشهر 10 وشهر 3 او 4 وتلاقيه عند الصيدلية البيطرية
ازاي تديه
تدوبي ازجاجة بتاعة المطعوم بكمية ماء لكن لازم ما تحتويش المية على الكلور يعني مش من الحنفية، وتاخدي شوية بالسرنجة وتشيلي بعدها الابرة (السنة) وتنقطي بعين كل حمامة نقطتين، وتحطي بمناخيرهم نقطة، وخدي 1سم من المطعوم وحطيه بـ (200) مل مية
لكن قبلها لازم يكون الحمام عطشان لمدة اربع ساعات

وشربيهم

والكمية المتبقية من المطعوم تخلصي منها في الصرف الصحي وحطي ميه وراهم

واغسلي الصحن او المكان اللي انتي حاطة فيه المية بتاعتة الشرب بليفة وصابون واغسليه كويس بالمية

بالنسبة لصوتهم بالليل عادي ما تخافيش

واهم حاجة تحميهم من القطط والأطفال

ودلوقتي ما تشتريش حمام تاني الا بعد ما تعرفي ازاي تعتني فيهم، ويصير عندك خبرة كويسة

واي استفسار احنا بالخدمة
وربنا يوفقك

[موري *]

جزاك الله خير علي الرد والاطاله انا استفدت من حضرتك كتير قبل ما اشترك في المنتدي وفعلا انا بعملهم بيت لانهم جم علي فجاه وانا بفصل بيت دلوقت بس متهيالي اصغر شويه من المقاسات دي