في ذكرى "لي لي"

[Mad Mood]

تذكرون لي لي

هذي صور لها







وهذا فيديو




للأسف ما عندي كاميرا ولا كنت صورتها كثير.. لأن فيه كثير مواقف معها كانت فعلا تستاهل تصوير



لي لي أول هامستر شريته في حياتي

ما كنت احب الهامسترات لكن لي لي شدت انتباهي بحركاتها ورشاقتها وهي تتسلق اسلاك قفصها في المحل.. شريتها.. ومن اول يوم حبيتها

كانت لطيفة وحبوبة وفضولية ومرحة ولعوبة بشكل لا يصدق

وبسببها حبيت شي اسمه هامستر وشجعتني اشتري هامسترات كثير

لكن بعد فترة صرت دايم اقول لاصحابي لي لي ضحكت علي.. خلتني افكر كل الهامسترات مثلها

ولما العبها واسولف معها كنت دايم اقولها يا بكاشة تضحكين علي ها؟

لأني شفت الفرق الهائل بين لي لي وباقي الهامسترات سواء الروسي مثلها أو السوري

والدليل انه إلى اليوم وبعد ما اتجهت لتربية الهامستر وانتاجه بهدف التجارة وصار عندي اكثر من 100 هامستر وفيهم مجموعة احبهم كثير وعطيتهم اسماء واتعامل معهم كل يوم.. اكتشفت انه ولا هامستر قدر ياخذ جزء من مكانتها

ولا هامستر يشبهها في لطافتها وجمالها وعلاقتها القوية فيني

لي لي ما كانت تحتاج تدريب ولا ترويض.. من اول يومين تعودت علي وصارت تطنش صحن الاكل والسقايه وما تاكل الا من يدي ولا تشرب الا من القطرات اللي احطها في اصبعي وتلحسها كلها لين يصير اصبعي ناشف.. لدرجة انو مرت ايام انشغلت انا فيها وصرت اقضي معظم يومي برا البيت.. فصرت اخاف على لي لي يصيبها جفاف وصرت كل يوم اغير مكان السقاية يمكن تشرب منها واحسب مستوى الماي عشان اعرف اذا شربت ولا لا.. لكن مافي أمل مصرة إلا تشرب من يدي وبس

يقولون الهامستر الروسي اجتماعي وما يحب الوحدة.. لي لي كانت بالعكس.. ما تحب تجلس مع هامسترات ثانية.. يمكن لأنها اغلب الوقت معي واخذها في مشاويري وسهراتي مع الشباب.. كانت تتسلق كتفي وراسي وتتعلق في اذني.. وتدخل بين ملابسي وتطلع الاكل المخزن في جيوبها وتاكل وتنام.. ما انسى احلى احساس.. الدغدغة في بطني وظهري يوم تدخل داخل ملابسي وتجلس هناك بالدقايق والساعات.. وكانوا الشباب يحبونها ويعرفون انها نقطة ضعفي.. لدرجة اني اذا بغيت شي من واحد يقول لي موافق بس تعطيني لي لي يومين.. وطبعا كان الجواب دايما: لا!

علاقتنا قويت لدرجة اني صرت افهمها من نظراتها وحركاتها.. واعرف من عيونها اذا تبي تنام فاحطها بيدي بطريقة معينة وتوماتيكلي تنام.. وهذا اللي عجزت احققه مع هامسترات ثانية ومع اني افهمهم لكن دايم احس اني عاجز عن فهمهم مثل لي لي

كنت دايم اناديها باسمها من بعيد فتتغير تصرفاتها وتوقف ع رجلينها وتقفز بجنون تدور لي لأنها تعرف انو وقت اما الاكل او الشرب او اللعب برا القفص

لي لي حملت عندي وولدت ثلاث مرات.. اول مرتين كان حمل وولادة ورا بعض.. والحمل الثالث خليته بعد الثاني بأكثر من شهر عشان ترتاح وجابت فيه 6 بيبيز قبل خمس ايام.. وكان في بالي اخليها كمان شهرين قبل الحمل الرابع لأني بغيتها تعمر معي اكثر

لي لي مرضت عندي اكثر من مرة وعالجتها.. اخطر مرض جاها اسمه مرض الذيل الرطب.. مرض خطير وقاتل تظهر أعراضه بعد الاصابة به بسبعة ايام.. وبعد ظهور الاعراض النهائية يموت الهامستر خلال 24 ساعة.. قتل واحد من هامستراتي لأني شريته وهو مصاب أصلاً وانتقلت العدوى لـ لي لي.. لكن من حسن حظي اني اكتشفته قبل ظهور الاعراض النهائية وعالجتها بنفسي في البيت وطابت وصارت صحتها احسن من اول

لكنها ماتت أمس

فجأة وبدون مقدمات

لقيتها منسدحة ع جنبها وعيالها الستة قاعد يرضعون منها وهي ما تتنفس.. ولما حركتها لقيتها يابسة

الشي الوحيد اللي اقدر اقوله اني كنت محظوظ جداً في لي لي.. وهي كانت سيئة الحظ فيني

الحين اطالع في باقي الهامسترات اللي ماليين الغرفة واحس الغرفة فاضية ما فيها روح

[Octopus]

شعور جميل من انسان يتذكر حيوانته و جزاك الله الف خير

و المهم حاول تعوض صغارها عن فقدان امهم

[marshmallow]

شعور جداً جميل لمآ تـكون هنآك علآقة بين الشخص وبين
حيوآن مميز نآدر مآ نجد لـ تصرفآته آو بآلـآحرى لـ شخصيته مثيل ..

سوآء من نفس آلفصيله آو غيرهآ ..

قد نجد نفس النوع والعمر والشكل حتى اللون لكن
مستحيل نجد نفس تلك آلروح آلبريئة وآلمميزة فيه ..

وصآحب آلحظ آلسعيد هو من يمر بـ ذلك آلشعور وتلك آلتجربة رغم مرآرة نهآيتهآ ..

وصحيح لي لي مآتت .. لكنهآ بآلقلب لـآ ..
معوض خير آخوي ..

وبآلعكس لي لي كآنت محظوظه بـ مربي مهتم مثلك ..

[مشاعل الرياض]

يالله قد ايش حزنت
نفس اللي صارلي نع ارنوبي عاش معي 4 سنوات كان مايفهمني الاهو الله يعوضك اخوي الفراق صعب

[عاشقة قطوتها]

ياااااللله وربي مرره تأثررررت ..انا حالياا امنية حياتي اني اشيل الهامستر حقي بين ايدي وابوسه بسس ماقدرر يعضضني عضةة تخلي يدي تنزف نزف ..الله يعوضك يارب وجد كانت هامستره مرره حبووبه ..

[احبك يابادجي]

الله يعوضك بوحده مثل لي لي واحلا وتصير علاقتكم اقوى واقوى

[Candy sweet]

انا ايضا سنوبول مات وفارق الحياة

[Abo_fahed]

الله يعوضك

قصة حزينة

ما أصعب فراق الأحبة

[عاشقه الحيـوانات]

الله يعوضك يارب هي ماتت لكن بالقلب لا

[meqdad]

الله يعوضك بأحسن منها يارب و انا جربة نفس شعورك

سلام