اشترك في نشرتنا البريدية ليصلك كل جديد

cockatiell · 11-11-2013, 01:08 AM

[IMG]

[/IMG]

اهلا بكل اعضاء وزوار المنتدى المحترمين

فى الاول كنت مش مهتم خالص بموضوع نظافة البياضات وكان بيموت فروخ كتير من عندى وماكنتيش بعرف السبب
بعد ما قريت كتير فى المنتدى وسمعت طرق لا حصر لها وصلت للطريقة ده ومش عارف هى صح بنسبة كام فى المية

1- طلعت الجوز من البياضة بعصاية صغيرة بس بشويش خالص يعنى زقتهم بس براحة علشان يطلعوا من البياضة واول ما طلعوا قفلت فتحة البياضة بكرتونة صغيرة علشان ما يعرفوش يدخلو
1-شيلت البيض وحطيته فوق البلكم بنفس الترتيب بتاع العش

2-ازلت النشارة القديمة وشيلت درج البياضة لحد ما بقت نظيفة جدااااااااااااا مافيش نشارة خالص

3-رشيت الدرج والبياضة بbutox 5% كويس جداااا 1سم على البخاخة

4- سيبت الدرج بره والبياضة مفتوحة (لمدة ربع ساعة او عشر دقائق ) علشان الريحة تروح وما تخنقش العصافير مع الملاحظة ان الريحة خلتنى ادوخ انبارح ويجيلى صداع نصفى (ودى تانى مرة تحصل معايا) معنى كدا انه بتبهدل العصافير لو ريحة مركزة

5-ركبت درج البياضة ورشيت يانسون فوق منه وحطيت نشارة خشنة بدل النشارة الناعمة ودى صورة للنشارة

[IMG]

[/IMG]

-رجعت البيض بنفس الترتيب وقفلت البياضة وشيلت الكرتونة

ملاحظات

النشارة بتتجاب من اى منشار جنب منك ممكن تملا شوال كبير كامل ب 2 جنيه بس يقعد معاك اكتر من 6 شهور لو بتغير النشارة كل عش

الbutox 5% من اى دكتور بيطرى جنب منك وهتلاقى العبوة الصغيرة ب 3 جنيه تقريبا مش متذكر بالظبط تكفى معاك 6 او 7 بخاخات وطبعا فى العش الواحد مش محتاجين غير بخاخة واحده يعنى هتقعد معاك فترة كبيرة جدا
اليانسون من اى عطار والاخ احمد عمدة كان قال يفضل انك تطحن الينسون علشان الرئحة بتاعته بتقى اقوى وده الصراحة لسه ما جربتهاش ( فائدة اليانسون بيبعد الحشرات وبيخلى ريحة العش حلوة)

انا عملت الموضوع ده لعدد كبير من البياضات (منهم معاه بيض وخلص) ومنهم (بيض ولسه بيكمل) ومنهم (فروخ)
الحمد لله الاجواز كلها رجعت البيضات تانى بعد التنظيف ده معناه ان الموضوع مافيهوش اى مشكلة لو اتبعت الخطوات بالظبط وبدون ما تخوف العصافير من البياضة طلعهم من البياضة براحة مش تضربهم

النشارة الخشنة افضل كتير من وجه نظرى وانا حبيتها اكتر من الناعمة اللى زى التراب اللى كل شوية تعمل عفرة لو البياضة اتحركت او الجوز اتحرك جواها واعتقد ده ممكن يخنق الفروخ
علشان وانا بشيلها من البيضات وبنظف اتخنقت من العفرة بتاعتها

اخر حاجه وهى خارج الموضوع عامل الطيور بتاعت على انها بتفهم وبتحس هتلاقيها بتتجاوب معاك ومش بتخاف منك حتى لو مسكتهم - ممكن يهوش او يعض خفيف لكن مش عض حقيقى
عاملهم على انهم طيور مش بتقهم هتلاقى اسوء معاملة منهم

[IMG]

[/IMG]

اتمنى الموضوع ينال اعجابكم

منقول

[IMG]

[/IMG]