$ مدوّنتك مع ببغاتك $

[كاسكوكيه]

السلام عليكم و رحمة الله و بركاته
أخباركم؟ عساكم بخير!

اليوم حبيت ابتدي موضوع معاكم.. عباره عن مدوناتكم مش عن اليوم كامل.. بس عن الوقت اللي تقضوه مع ببغاتكم .. هالمكان مش عشان نسأل.. ولا عشان نعرض مشكله.. مجرد أي شي سويته مع ببغاتك.. واضح؟

ببتدي معاكم و بطرح يومياتي مع "شامبيه"

اليوم: 10 أكتوبر 2008 (تاريخ البارحه)

حبيت اني اطلع شامبيه في الحوش عشان يشم شوية هوا قريب الساعه 7:30 الصبح.. و معاي الكمبيوتر.. شويه اكلم شامبيه و شويه ع المنتدى و المسنجر .. اكلم شامبيه ما يرد عليه لانه بعده ما تعلم الكلام.. بس قهرني يوم سمع أصوات العصافير الي تطير في الشير.. قام يصقع شراتهن بس ع العموم تأكدت انه مب ابلم

شغلت له فيديو ببغاء تتكلم و خليته مجابلنه قريب النص ساعه.. و سرت عنه في الصاله اطالع برنامج ع التلفزيون.. وشوي لقيته فج السلسله اللي في ريله.. و بدا يرفرف بيناحاته

رحت عنده و بديت اكلمه عشان يهدا بس ما نفع معاه.. شوي.. الأخ جرب يطير.. و نسى انه يناحاته أقصر من أنه حتى يجرب يرفرف بها المهم طار شوي و انخش عني ورا أصايص الزراعه.. و بعد زور حيله قدرت اني اطلعه ع الستاند ورجعته في الصاله..


الساعه: 5:30 العصر..

شامبيه ما شاء الله عليه تعلم انه يوقف على ايدي على عكس سمسم.. أنثى كاسكو بعمر 6 شهور بعد.. بس مش انا المشرفه على تدريبها (عشان جيه طايح حظها )
قلت بلعب مع شامبيه جدامها احتمال تغار منه.. حطيتهم اول شي بعيد عن بعض.. و بعدين قربنا المسافه

... اول ما تقربو من بعض ع طول سمسم من الستاند مالها ع ستاند شامبيه.. تمو دقيقه بس يجوفون بعض و بعدين ... صارت مناقيرهم في بعض (أظني كانت بوسه )

و كل شوي نفس الحركه.. او انه ينزل راسه و هيه تلعب في ريشه و العكس.. للعلم أول مره نحطهم مع بعض


الصدمه الكبيره يوم شامبيه فتح السلسله و رماها .. و سمسم طبعن كانت متابعه متيقضه للحدث.. على طول رفعت ريلها و بدت تحاول تفتح السلسله

طبعن و نعم المعلم شامبيه.. بس ما ريده يخرب بنت الناس
كان عندنا عيال اخوي.. فحبيت اني شوي استعرض اللي تعلمه شامبيه (مش من زود ما تعلم)

حطيت ايدي جدامه.. و ركب عليها.. و من بعدها قام يرتفع و يرتفع و يرتفع الين وقف على جتفي
طبعن اول مره يسويها.. و انا بصراحه كنت خايفه على عيني و لا اذني تصير في خبر كان

مشيت به الين الحديقه و كان فيه قطاو قلبي طاح من الخوف عليه!! بس عادي رحت الين لمة أهلي و يلست معاهم.. و شامبيه على ايدي ما قال شي.. و من بعد تقرين 5 دقايق مشيت به ألين الصاله عند سمسم.. ^^

و بعد الساعه 9 (بعد العشا و المشاوي ) و صلت شامبيه لبيته اللي هيه الصاله الثانيه.. و عيال اخوي كان في خاطرهم "يدربون" شامبيه

المهم راويتهم كيف اني احط له عصا الستاند و اقول له هوب و ينقز من عليه.. واحد واحد فيهم جربو يقولوا له "هوب" و ما شاء الله عليه سمع كلامهم و سوا اللي عليه

عطيته كم حبة حب شمس.. و رجعت له القفص ماله.. و قلت له تصبح على خير

ان شاء الله ما اكون طولت عليكم.. و اتمنى أقرا يومياتكم مع ببغاواتكم

[افريكانو]

مشاء الله عليج اختى كان يوم شامبية شاق و حافل بالاحداث بس انا لاحظت انك مركزة على تدريب شامبية اكثر من سمسم هل في سبب معين او انه فيه خطة مدروسة مسبقة

مشكووووووووووووووووور على اطالعنا بمدونتكي الرائعة و الى الامام و اتطلع الي جديدك

[كاسكوكيه]

شامبيه طيري.. و سمسم طير أختي

[افريكانو]

اها وضحت الصورةمشكووووووووووور على الافادة

[LiLi]

كاسكوكيه

أستمعت بالقراءة

بس يا ليت لو تكملي معروفك و تحطي لنا صور طيور

تراني أموت على صور الطيور و أبغى أشوف طيور كل الأعضاء

و موفقة إن شاء الله

[كاسكوكيه]

بحط صورة البوسه ان شاء الله

[a.s.a]

السلام عليكم ورحمت الله

شكرا اختي كاسكوكيه على الموضوع الحلو

اما انا عن يومي مع الكاسكو

كان فيه احداث كثيره بعد

اولها اني سميته بعد شهرين من مناداته حبيبي

وكان الاسم اللي اخترته (كيكو)

والشي الثاني اليوم كان ثاني يوم لي في ترويض كيكو

احطه بالغرفه واجلس اتضارب معه << بس عطاني عضتين مع اني لابس القفاز << تعووور
المهم ان الطريقه في الترويض هي مسكه مع رجله واخليه بيدي صح انه كم مره طار وحاس الدنيا << جناحينه مو مقصوصه

بس الحمد لله وادعوا لي بالتوفيق معه

[كاسكوكيه]

موفق خير أمين

و الله يعينك على عض كيكو

[مظلوم_جميرا_1]

والله شي جمييل جدااا

اول شي بصراحه انا واحد يديد عندكم فالمنتدى هذااا

لاني يلست ادور منتدى نفس هذا ما حصلت

واكثرهم بيع وشراء

والحمدلله توني لقيت ها المنتدى وعيبني بصراحه

بوجود عيال البلاد وناس ثانيه بعد

المهم بخصوص شامبيه زين تسوينبه


انا عندي كركر دلووووع ودومه يباني ايلس امسحله راسه ^__^ والحين توه بداا يرمس


وشكراا لج الطيبه

[طير سارة]

كاسكوكيه

مشكلتي مع الكاسكو حقي >> انه بس يصير في القفص او على القفص >> مااا اقدر اشيله على يدي

لكن لو طار وصار في الارض بس احط يدي و اقوله تعاااااااااال >> يجي ويركب على يدي ونصير اصدقاء

و اقدر امسح على راسه

من حوالي شهر صااااااااار يقول بعض الكلمات وكل اسبوع اسمع منه كلمة

الله اكبر

السلام عليكم

وي وي ( يصيح صياح طفل ) وتالي يقوووول عبوووود

ويقول كلمات للحين غير واضحة

ويصفر تصفيرة >> هبي بيدري تو يو .. مع اللحن

بس ودي انه يعقل اشوي واذا جيت اشيله من فوق القفص ما يسوي فيهااااا اسد

واناااا اردد عليه الكلمات اللي ابغاهااا آخر الليل او اي وقت تكون الصالة فيهااا هدوء

وللمعلومية بس يسمع كلام وإلا سوالف في الصالة او صوت التلفزيزن مرتفع اشوي

مااااا يخلي كلمه حافظهااااا ماااا يقولهاااااااا وهذا اللي مجنني >> لاني ما اسمع كل الكلمات بوضوح

بسبب الفوضي ولو جيت عنده علشان اسمع > سكت

تحياتي