تراني جلدت الطير مردغته تمردغ

[سنايديه]

السلام عليكم ورحمة الله وبركاته


طبعا الحين انت متواجد في الصفحه لان العنوان شدك

وتبي تعرف ليه ضربت واستقويت وطلعت عضلاتي على طير ضعيف لاحول ولا قوه

طبعا اعوذ بالله ان اكون من الجاهلين واضرب مخلوق ضعيف واستقوي عليه

لكن اليكم التالي

مره من المراريت انا كنت اتصفح مواضيع عن الطيور لقيت موضوع يقول فيه صاحبه

ان الطير تبعه خواف ومايرضى انه يخليه يمسح عليه فقام اخونا في الله يضرب في الطير

والطير قام يصرخ وانه لما شاف الطير يصرخ زاد الضرب في الطير والطير يصرخ واخونا يجلد

والطير يصرخ واخونا يكمخ والطير يصرخ والاخ يمحط وعقبها الطير اصيب بنوبات خوف عنيفه

سلامات اخوي

خير ان شالله

يا خي بالغصب الدعوه يا امسح عليك ولا ابمسح بك الارض

موب لازم تمسح اصلا من قالك تمسح

يا خي وش ها الحب العنيف الي انت عايش فيه

فاهم التمسيح غلط انت

ياخي تخيل انك غراب وتطير في الغابه على راحتك من شجرة برشومي لشجرة حنظل

وجا واحد وصادك بطريقه وحشيه وحطك بصندوق ودربي دربي لسوق الحمام

وجا واحد وشافك وعجبته وشراك وحطك في قفص ثلاثه شبر في اربعه شبر

ودربي دربي على البيت

انت الحين وش احساسك هنا بالله قلي وش احساسك

يجي اخونا في الله الي شراك بيسوي مروض وفاهم بيمسح على ظهرك وش

ردة فعلك قلي كيف بتكون

يعني بتنبطح على بطنك وتخليه يمسد ظهرك ياكني بك ودك تقبط خشمه من مكانه صح ولالا

حط نفسك مكان ها الطير المسكين بعدين ارفع يدك واضرب ياقوي يا عظله ياشنب

هجدنا بس وتراهم يمدحون هاالايام الأسد يقولون اشتره وحطه بالصاله كذا بدون قفص حر طليق

وجوعه اسبوع امن رح عنده وامسح على ظهره يقولون ما هنا اطيب من المسح


على ظهره على طوووول يولفك ويركب على كتيفات تشوف اما صار حمامه


ما اكون سنايديه
واعذروني على ردات الاسلوب ولكن شيء خارج من القلب فقط

[الآسطورهـ]

فعلا فيه كثير من الجُهال يضربون طيورهم او الحيوانات بشكل عام

بالله ماقدروا يتقوون إلا على الحيوان الضعيّف المسيكين ؟!

يعني مثلا لو ضربوا الطير بيتكلم وبيصير آليف ؟

بالعكس بتنكسر شخصيته وتتعب نفسيته !

آخ بس متى يعقلون

شاكر لكـ على الطرح الحساس !

S.W.E.D

[ابو محمــد]

إذا وليتم فارحموا

بصراحة اسلوب فكاهي وبنفس الوقت يستفاد منه,,


اشكرك على التوضيح وان شاء الله مافي احد في المنتدى يضرب او يعاقب ببغائة او على قولتك يمردغه.

اخوك ابو محمــد

[دلوعةقطوتي]

<<<شافت العنوان وكانت جايه بتهاوووش
صدق حررام اللي يضرررب حيوووان مافيه بقلبهم ذرة رحمه ومايدرون ان الله بيحاسبهم
واللي ضرب طيره ان شاءالله يده تنكسر
تسلمين عالموووضوووع

[كاسكووووو]

يوم قريت العنوان بغيت اخش عليك وواريك كيف الجلد ههههههه

[medozoom]

هههههههههههههههههههه

احييك على اسلوبك

والله شوفي يا كثر الي يضربون طيورهم

أخاف نوصل لمرحله نشوف واحد يضرب ببغاءه واحنا نشوف وعادي ولا كانه صار شي

مثل الي يرمون البساس ( القطط ) بالحجار وعادي ولا كانه صاير شي

ما نقول الا كل واحد وله حسابه

وفيه احد الاخوان كاتب بتوقيعه التدريب فن وذوق من ضرب

يعني الطير لما تضربه وش تستفيد

فيه فرق بين تكسر عين الطير وفرق انك تضربه

تكسر عينه ما تبين انك خايف مو تكسر عينه وقلبه وريشه وجسمه وتقلبها مضاربه حواري

تقبلي مروري

[عاشق املج]

صباح الخير ع الجميع
بصراحه العنوان شدني وانا اول ما شفت العنوان ولسه ما قريت ياأني سبيت سب الله العالم فيه ولكن بعد قراءتي للموضوع فهمت بس انا صار لي موقف مع طيري وديته عند مدرب ودربه الطلوع ع اليد في ضرف ساعتين وبعدها رحت للبيت والله الطير على ما يرااااااام وصرت اطلعه على ايدي الأطفال وحنا مبسوطين ولمن رجعت للديره طبعا مقر عملي كان عندنا ارحامي وقلت خلني اكشخ عليهم ووريهم الحرافه ويومن فكيت له القفص واقوله اطلع اطلع اطلع لجل الله يخليك لا تفشلني والناس تتفرج علي وانا اقول بنفسي الله يخسك فشلتني وارجه اردد عليه اطلع طولت صح ههههههه ما تحسون انها اكشن ابوراشد والطير ترى بسميها مغامره طيب نرجع للموضوع واخيرا جاك طلع والحمدلله (جاك اسم الطير) وبس وتريه يغفلني ويعضني هديك العضه الي خلاني اشوف نجوم الليل بعز الظهر وانا اصكه هذاك الكف على منقاره يالله لله يفكوني الناس منه بغيت اقضي عليه تراني بالغت بالكف صح بس ضربته على منقاره وسلامتكم

[خالد414]

اول شي اهنيك على الطرح الرائع والموفق

وثاني شي انا الصراحه اول ما شفت الموضوع قلت خلاااص هذول الناس ما ينفع معهم الكلام

ولما قرأت الموضوع والله ارتحت نفسياً .....

لاني حسيت ان فيه ناس واقفه مع الطيور او الحيوانات بشكل عام

والله شي يحزن انه فيه ادمي.. انسان عنده عقل يضر البهائم اياً كانت

لانها عندها احساس ومشاعر وغير كذا اصلاً ديننا امر بالرفق بالحيوانات

واكيييد كلنا يعرف المرأه اللي دخلت النار بسبب الهره

ما اقووول الا الله يجزاك خير ويكثر من امثالك

ويجعله في موازين حسناتك

وآسف على الاطاله

دمتِ بود

[ERIC]

الصراحه ناس مايخافون الله !!



وبصراحه الأنسان اللي يعمل هذا الشي انا أقول هذا شخص مريض !! مسوي لي فيها رجال على ببغاء لاحول له ولاقوة ..


وما نقدر نقول غير لاحول ولاقوة الا بالله العلي العظيم


تحياتي لك على الطرح المتميز

[عاشقة البلابل]

يسلموووووووووووووووووووووووووووووووووووووووووووووووووووووووووووووووووووووووووووووووووووووووووووووووو