[Dominique]

[CENTER]

الله يسلمكم هالأيام قرقيعان 3 أيام وفي ناس يمدونه 4 أيام واحنا من الأربعاء بدا عندنا ..

القرقيعان عادة وايد حلوة وقديمة بالخليج وخاصة بالكويت وقطر ( قرنقعوه ) والبحرين( قرقاعون )..
يشترون أهل البيت القرقيعان وهو عبارة عن أنواع متعددة من الحلوى واسمها بالكويتي وسامحوني اذا ما أعرفها باللغة الفصحى:

البرميت( شي دائري وردي، أبيض، أزرق أو أخضر بطعم النعناع ) ، السبال( الفول السوداني) مع قشوره ، النخي المغلف بالسكر الملون، بيض الصعو ( لوز مغطى بسكر ملون ) + حلوى المصاص أو lolipop ، علكة بحجم صغير ، حلوى متنوعة بحجم صغير ، جيلي البيبسي وهذا شائع وجيلي متنوع النكهات ، شوكولا بأي نوع سادة أو محشوة و جميع أنواع الحلويات المتوفرة حاليا بالاضافة للحب ( اللب ) بجميع أنواعه وفي ناس يضيفون قطع نقدية من العملة المحلية للقرقيعان من الفرحة بأولادهم .

بعد صلاة العشاء يلبس الأطفال اللبس الشعبي للكويت مثلا للولد الدشداشة الشد أو العادية مع السديري والقحفية ( الطاقية المزخرفة ) مع كيس القرقيعان .

البنت تلبس الدراعة أو البنجابي المزخرف مع البخنق وكيس القرقيعان .

ويجتمعون ليطوفوا على البيوت ويطرقون الأبواب ويسئلون :

" عندكم قرقيعان ؟ " أو

" يسوق الحمار ولا ما يسوق ؟ " وإذا أجابت صاحبة البيت بالنفي يقول الصغار :

" ويص ويص في بيتكم جعاميص " ويرمون أبواب البيت بالحصى و روث الحمام والطيور وهي الجعاميص . واذا أجابت بالايجاب تخرج للخارج وفي يدها الزبيل أو السبت ( سلة من القش تحتوي القرقيعان ) وان كان لها ولد مثلا اسمه محمد وبنت اسمها فاطمة يغني الأطفال :

سلم ولدهم يالله خله لامه يالله .. سلم حمود يالله خله لامه يالله
فتعطيهم كل واحد خمطة ( قبضة بحجم الكف من القرقيعان ) ثم يغنون :

قرقيعان وقرقيعان ................. بيت قصير ورميضان
عادت عليكم صيام ................. كل سنة وكل عام
الله يخلي فطوم ................. الله يخليها لامها
عسى البقعة ما تخمها ................. ولا تواسي على امها

واذا انتهت يقولون وهم ذاهبون :

[CENTER]عساكم تعودونه .............. كل سنة و تصومونه

ثم يأتي غيرهم من الأطفال إلى ما قبل منتصف الليل طوال 3 أيام وهي 14 و 15 و 16 رمضان ..

وهذه أحلى عادة ينتظرها الأطفال بفارغ الصبر ليجمعوا أكبر قدر من الحلويات .. والنساء المتزوجات أيضا لكي يتباهين بأشكال تغليف القرقيعان فقد أصبحت هناك مناسبة في كل بيت يوم واحد من هذه الأيام الثلاث لكي توزع كل ام أكياس مزينة ومزخرفة تحتوي قرقيعان عن أولادها وبناتها والبعض يضعها في صناديق راقية و ( كشخة ) تحتوي الشوكولا والحلوى الغالية للنسوة الكبار في السن ( وخاصة الكنة تباهي عديلاتها في تقدير أم زوجها )



الله يسلمكم آنه عاد شسويت ..




شريت قرقيعان وحطيته في زبيل ولما طقوا اليهال باب السكة .. دخلتهم الحوش وفتحت باب الصالة ..


تعتقدون منوا كان في انتظارهم ؟؟؟؟

دومينيك

قتلهم اذا ما قرقعتوله ماكو قرقيعان !!!!!!!!!

استغربوا مساكين.. شفيها هاذي ينت ( جنت ) نقرقع حق قطوة ؟؟!!!!

والله وقرقعوا :


سلم ولدهم يالله ... خله لامه يالله ..... سلم دمدم يالله ... خله لامه يالله

وبعدين ترست أكياسهم قرقيعان بس عاد قرقيعاني كشخة من الغالي حق الغالي ..
شسوي والله من كثر ماني مستانسة فيه .. بيتنا وخالاتي ماتوا ضحك علي .. وعمتي مسكينه بعد عمري من كثر ماتحبني اشترت كيس قرقيعان حق دومينيك !!!

طبعا آنه باكله مو دمدم

شرايكم ... مو ينيت ( جنيت ) ؟؟







...