[lorelored]

السلام عليكم ورحمة الله وبركاته

أنا مشكلتي مشكله مع بستي!

ماأدري إيش أعمل فيها!

القصه ومافيها إني كنت أظن إنها حملت وقبل كتبتلكم مواضيع إنها حملت لكن طلع حمل كاذب!

لذحين بس تصرخ بأقوى ماعندها وتبول الله يكرمكم في كل مكان!

والذكر اللي عندي بالغ لكن لسا مو جاهز للتلقيح!

عمره يمكن 10شهور

المهم خفت عليها قولت يمكن مو في صالحها التأخير على ماقرأت في النت!

جيبتلها الذكر حق أخويا بالغ وجاهز لكن تضربه وهوه ماصدق صار يعملها في كل مكان وأنا صرت بس وراهم أمسح!
وياليت عاد رضيت فيه وهوه جالس أكثر من إسبوعين عندها برضوا تضربوا

إضطريت أرجعه لأخويا والمشكله ماأعرف ذكر غيره!

بحثت في النت أعلنت عملت مافي فايده!

إضطريت غصباً عني أروح لمحل من المحلات وأسألهم عن خدمة التزاوج وياليتني ماروحت!

عشان آخذ ذكر منهم يتزاوجها في البيت عندي قالي ب200ريال وقولتلهم أهم شي خالي من الأمراض

قالي لاتخافي إحنى مش بنعطي حد أي قط فيلوا أمراض نهائي!

وأنا سمعة المحل خدعتني عشان قبل كذا كل ماأروح له ألقى كل القطط اللي عنده كانت نظيفه!

وصدقتهم وإعطيتهم ال200 ووصلولي الذكر للبيت!

لكن طلع يوووووه كل شويا أكتشف فيه مرض جديد معاه الله يكرمكم(إسهال -فطريات) وريحته تقرف مرره وحتى إستحمام مو محممينه فجايبينه ليا بقرفه!

إتصلت عليهم وقولتلهم تعالوا خذوه أنا شرطت عليكم إن يكون نظيف وخالي من الأمراض مو جايبين لي واحد كذا!
ورجعولي فلوسي قال لا نجيبلك بديل لكن مانرجع الفلوس

وبدلوه ليا بواحد ثاني أنشط منه ومافيه إسهال أو فطريات لكن الله أعلم من الداخل(الله يستر)

لكن برضوا مو محمم وفيه ريحه للأسف!

لكن المشكله ومافيها إن البسه تضربه نفس الشئ!!

أخاف أكون تعبت نفسي ودفعت الفلوس كذا على غير شي

المشكله أكله عليا وكله عليا وب200وآخر شي جايبيلي بسس مونظيفه!

إيش الحل علموني ترا أنا ماأدري إيش أعمل تعبتني مرره وأصلاً ماأدري إذا كانت طالبه تزاوج أو لا لكن

اللي خلاني أشك إن تزاوج إنها تصرخ طول الوقت مع إن أكلها وشربها عندها وبرضوا الله يكرمكم تبول

في كل مكان مع إن الليتربوكس عندها ولحد يقولي يمكن ماتعرف الليتربوكس لا أنا معلمتها عليه من

صغرها وطول عمرها تعمل فيه لكن بعد ماصار عمرها 7شهور صارت تصرخ وتبول في كل مكان فشكيت

إنه طلب تزاوج

وهي عمرها ذحين سنه وشهرين يمكن وللأسف إلى الآن تصرخ وتبول الله يكرمكم فهذا الشئ يثبتلي إنه طلب تزاوج لأنه ماحملت لسا فعشان كذا الصراخ نفسه والتبول نفسه إلى الآن!

رجاء واللي يسلمكم ساعدوني ماني عارفه إيش أسوي فيها!

وهل في إحتمال إنها ترضى بالذكر الجديد؟

(خايفه إنها تعملي مثل ماعملت مع ذكر أخويا تجلس وقت طويل وهيا ماتبغاه وكأني خسرت200 على ولاشي!)

وهل ممكن إذا بنتظر قطي إلين مايجهز (عمره تقريباً10شهور)
ولا في ضرر عليها؟

ومعليش طولت عليكم لكن والله من القهر والتعب اللي تعبتني إياه هذي القطه!

رجاء ساعدوني وأجيبولي عن الأسئله بارك الله فيكم وجزاكم ألف خير