[M a Y e D]

السلام عليكم ورحمة الله وبركاته

اليوم حبيت اكتب لكم عن حنفي وامون ... وطبعا حنفي وامون كاسكوين عندي وما شاء الله عليهم قمة في الشقاوة والازعاج، وان شاء الله بتكلم اول شي عن شخصية كل واحد فيهم وبتكلم عن اكلهم وطبايعهم.

اول شي سبب تسميتي لهم باسم حنفي و امون هو نسبة الى شخصيات شعبية الكرتون



وبصراحه عجبتني شخصية حنفي وعشان جذيه سميت الكاسكو الثاني امون ، لان حنفي لامون وامون لحنفي

المهم الحين نستعرض شخصية امون :



الاسم : امـــــــــون
النوع : الافريقي الرمادي
الجنس : انثى
العمر : تقريبا سنه
الشخصية : نشيطة - متسلطة - انانية - دلوعه - غيورة - ضرابية - سريعة التعلم
بشكل عام هي حبوبه ونشيطه ووايد متعلقة فيني ، من ارجع من الداوم وتسمع صوت السيارة تقعد تصارخ، واذا سوت شي غلط وحاولت اعاقبها تتقرب مني وتقعد تقول مياووو اونها تتدلع

الاصوات اللي تقلدها: اسمي - اسم زوجتي - صوت القطوة - صوت البوسه وتقول بوسه - صوت كحتي - تقول متوه.

وهاي بعض من صورها :









صورها وهي معاقبه في القفص وممنوعه من الخروج






والحين مع شخصية حنفي:




الاسم : حنفي
النوع : الافريقي الرمادي
الجنس : ذكر
العمر : تقريبا سنه وكم شهر
الشخصية : هادي - يحب الاكل - مسالم ومغلوب على امره عشان جذيه امون متسلطه عليه وراكبه على راسه - مغرم بشي اسمه نعول (وانتوا بكرامه) يعني يحب يقرض النعال ولما خشيناهم عنه صار مغرم بتواير السيارات شكله ناوي يشتغل بنجرجي خوش مستقبل والله.

الاصوات اللي تقلدها: صوت القطوه ويقول بوسه ويقلد صوت الاسعاف ويقول متوه.

وهاي بعض من صوره :









طبعا هم كزوجين يعتبرون فاشلين بصراحه لان امون متسلطه وحنفي هادي وكل يوم تتضارب معاه وتغسل شراعه وهو لا حول له ولا قوه مع انه اكبر منها والمصيبه انه ذكر ( حسافة على الرياييل )

هاي صور من الهواشه اللي تصير بينهم، طبعا حنفي اللي واقف على اليسار







والحين مع اكلهم :

طبعا احاول انوع لهم في الاكل وما اعطيهم الا كل شي طازج ، وطبعا هم ياكلون تقريبا كل شي وهاي بعض الوجبات اللي يحبونها:

الرز



الذرة



عظام الدجاج



المانجو



قصب السكر



الكستناء



الجزر



الثوم ( وبالنسبة للثوم فالاخت كاسكوكية قالت لي انه يعتبر مضاد حيوي طبيعي - جزاها الله الف خير والا بصراحه انا كنت متخوف اني اعطيهم )



وطبعا بعد الحب الشمسي والفول السوداني بس هالاكلات اكثر يحبونها.


هذا كل شي عن امون وحنفي والله يصفي قلوب امون على حنفي وترضى عليه ونشوف ذريتهم ان شاء الله