[h_fares el nour]

السلام عليكم ورحمة الله وبركاته

انا كانت معايا قطة بلدي (( من لما كانت في حجم الايد لحد ماكملت اكثر من 3 سنوات )) لكن للاسف من اقل من اسبوع ماتت

كنت بالعب معاها اغلب اوقات اليوم وكنت باحبها جدا

كانت ذكية قوي وشرسة قوي وبتعض وتخربش وتحب اللعب جدا وكانت بتعرف تفتح الابواب وتخاف من كل الناس الا انا ولما يرن جرس الباب تجري وتستخبى لو كان حد غريب وتختفي تماما وتظهر لما الضيف يخرج وتفتح اواني الاكل وتأكل أكلنا واتسببت لنا في مشاكل .. لكن رغم دا كله كنت باحبها وكانت كل المشاكل اللي بتعملها بسيطة بالنسبة لي طالما هي مبسوطة وسعيدة

عموما انا مفتقدها جدا وعاوز اجيب قطة جديدة (( احتمال تسليني وتنسيني قطتي ))

ايه هو نوع القطط القريب من صفات قطتي (( نشيطة جدا وذكية جدا جدا وشرسة وبتخاف من كل الناس الا انا وتتعلق بصاحبها جدا وتحب اللعب ومسلية ))

بالاضافة الى انها تقبل الاستحمام بالماء وتقبل تفضل في البيت طالما اعتادت عليه من صغرها

وكمان سؤال .. ممكن اعطيها كل فترة حقنة منه طلب التزاوج علشان ماتولدش ؟؟

وهل القطط البلدي لو لقت نفس العناية بالقطط الشيرازي هيكون مثلها ؟؟ ولا البلدي اصلا نوع سيئ وفيه صفات مستحيل تتغير ولما يكبر تظهر صفاته السيئة ويخرج من البيت ويبقى غير نظيف ولا يقبل الاستحمام ؟؟


منتظر ردودكم ..