منتديات تو زوو - اصفرار باللون ..؟

منتديات تو زوو (http://www.2zoo.com/vb/index.php)

- سؤال و جواب لقسم هواة القطط (http://www.2zoo.com/vb/forumdisplay.php?f=59)

- - اصفرار باللون ..؟ (http://www.2zoo.com/vb/showthread.php?t=182561)

توهقنا

23-09-2010 06:59 PM

اصفرار باللون ..؟

بسم الله الرحمن الرحيم

السلام عليكم..

بسبس استفرغ امس طعامه ... ورجع استفرغ سائل بني شفاف ..ووقفت الاكل عنه 12 ساعه وعطيته الفجر دراي فود وماستفرغ للحين

طبعا توقعت انه من البرد .. وغيرت مكانه لمكان ادفى

لكن اليوم تحول لون انفه واذانه وجفونه وفمه الوردي...الى اصفر !!!!

مع خمول وكسل

ومع العلم ان اكله كله دراي فود .. ووجبه وحده معلبات وسكاس دجاج

واعطيه يوميا فتامين العصار "فاتح لشهيه"

وش سبب الاصفرار ..؟

وكيف اعالجه انا .. لا يتوفر بيطري بمنطقتنا
بانتظاركم .. باسرع وقت

أمازون

23-09-2010 07:20 PM

رد: اصفرار باللون ..؟

انا ما اعرف ايش السبب

بس بصراحه هذا اكل وسكاس اخس و أسوأ نوووووووووووع على وجه الارض
مع ان الشباب يمدحونه و لكن قطوي عبسي من ياكل وسكاس يرجع و يستفرغ و نفس الشي سائل لونه بني فاتح اللي هو بقايا الاكل الغير مهظوم من وسكاس ..

و للمعلومه و الله يشهد علي كلامي ان الاكل اللي يستفرغه من وسكاس اغلبه يكون لمن اعطيه الدجاج .

نوعيه 9lives هي افضل من وسكاس بمليون مره ، و لا شفت قطوي مره وحده استفرغ منها .

pinky

23-09-2010 07:47 PM

رد: اصفرار باللون ..؟

يمكن أخذ برد
ووسكآس لآ تديييه أبدآ يختي المعلبات كلهآ لاتديه مضارها اكثر من نوآفعهآ

خلي بطنه ترتآح ولا تديه شي حآليا , ألين بعد 4 ساعات تقريبا اديه دجاج
ولاتعرضيه لأي مكيف ولا هوآ

وأحرصي على توافر الماء النظيف

وقدآمه العافيه يارب

توهقنا

23-09-2010 08:08 PM

رد: اصفرار باللون ..؟

يعطيكم العافيه ماقصرتو

لكن انا اسأل عن سبب تحول لونه الوردي الى اصفر ..!!

هل هو علامه على مرض بالكبد لا سمح الله..

بنتظاركم

توهقنا

23-09-2010 10:58 PM

رد: اصفرار باللون ..؟

صار يمشي بترنح وعضله فخذه ترتجف.. :(

دلوعةقطوتي

24-09-2010 12:21 AM

رد: اصفرار باللون ..؟

ياحياتي ربي يشفيه لك
اول شي اقطعي الاكل والمعلبات واعطيه زبادي مع ملعقه عسل عشان يطهر معدته وحاولي يشرب مويه
هذا اللي اقدر افيدك فيه
وماقلتي يسهل مرشح فيه اعراض ثانيه غير الترجيع يمكن ماتقبل الاكل

توهقنا

24-09-2010 12:46 AM

رد: اصفرار باللون ..؟

اقتباس:

المشاركة الأصلية كتبت بواسطة دلوعةقطوتي (المشاركة 1744707)

آمين

قطعته عنه .. وعطيته دجاج مسلوق قبل ساعتين .. وللحين ماستفرغ

والاخراج مره باليوم .. وطبيعي

والترجيع امس بس مرتين ..الاولى الاكل غير مهضوم والثانيه سائل فقط

وفيه عطاس خفيف

لكن هالاعراض معروفه ..

الي محيرني انقلاب لونه للاصفر !!!:wao:

يمكن فيه تسمم ..؟

لنه اخر وجبه كانت معلبات مفتوحه جديد ويمكن طريقه التخزين افسدتها !!

وش رايك اعطيه فلاجيل .؟؟ ينفع لتسمم .؟؟

دلوعةقطوتي

24-09-2010 12:50 AM

رد: اصفرار باللون ..؟

انا مالي بالعلاجات بصراحه اخاف اجربها
انتي اعطيه زبادي وملعقه عسل لانها تطهر المعده
انا بدور لك على سبب التحول للاصفر واذا لقيت قلت لك

الخبيرة ناديا

24-09-2010 01:46 AM

رد: اصفرار باللون ..؟

للاسف الاعراض اللي وصفتيها في القط تتشابه مع مرض الكبد عند القطط..

هنا اعراض القط المصاب بمرض الكبد:

-الاستفراغ

2-فقدان الشهيه

3-فقدان الوزن

4-البراز اللين ويكون لونه رمادي

5-الضعف والخمول

6-لون البول يكون غامق مائل للبرتقال

ومن العلامات المتقدمه والواضحه على القطه المصابه بمرض الكبد:

1-اليرقان -الصفار

2-التشنجات

3-ارتباك

4-انتفاخ البطن من تراكم السوائل فيه

هل لاحضتي عليه كل هاذي الاعراض؟؟

انتظرك

توهقنا

24-09-2010 01:59 AM

رد: اصفرار باللون ..؟

-الاستفراغ ,,, مو دايم بس اذا اصيب بالبرد
2-فقدان الشهيه,, فتره التزاوج فقط
3-فقدان الوزن,, بالعكس كان سمين وخففنا كميه الوجبات
4-البراز اللين ويكون لونه رمادي ،،، لا طبيعي جداا
5-الضعف والخمول ,,, فقط من يومين
6-لون البول يكون غامق مائل للبرتقال ,,, لا طبيعي
1-اليرقان -الصفار ,,, اليوم فقط
2-التشنجات ،، مافهمت لكن مافي عرض غريب
3-ارتباك ,,, ترنح خفيف وهو يمشي
4-انتفاخ البطن من تراكم السوائل فيه ,,, بالعكس ضامر
هل لاحضتي عليه كل هاذي الاعراض؟؟ جاوبتك عليهن كلهن

الخبيرة ناديا

24-09-2010 02:09 AM

رد: اصفرار باللون ..؟

الحمدلله

قطك ممكن معاه زكام ..بدليل عطاسه المتكرر

اعطيه بيتاموكس ممتاز جدا ..واذا ماعندك صيدليه بيطريه ممكن تعطيه بديل مثل مضاد اقمنتين

والاصفرار الموجود فيه هو بسبب كثره الفيتامينات..

اقطعي عنه الفيتامينات مؤقتا واعطيه اكل طازج من دجاج مسلوق مفتت بمرقه السلق بدون ملح او بهار

واعطيه جبنه مثلثات مره فقط في اليوم .

وابعدي عن المعلبات لان اكثر الامراض منها ..لانك اذا فتحتي العلبه واعطيتي القط وبقي كميه فيها

ورجعتيها في الثلاجه ..هنا ممكن تنمو بكتيريا في الاكل ويسبب مشاكل للقط .

ولو فيه تسمم كان لاحظتي زياده في اللعاب ..

ولو فيه التهاب في الامعاء كان لاحضتي عليه الاسهال الشديد واحيانا مع دم.

لاكن الحمدلله من وصفك لقطك مافيه الا زكام خفيف .

توهقنا

24-09-2010 02:20 AM

رد: اصفرار باللون ..؟

الله يعطيك العافيه طمنتيني الله يطمنك :freind:

الحين اقدر احتفل باليوم الوطني

اعطيه مضاد 2 سم مره باليوم ..

طيب الترنح هل بسبب الزكام ؟

الخبيرة ناديا

24-09-2010 02:27 AM

رد: اصفرار باللون ..؟

ويعافيك حبيبتي..

لاء . 2سم كثيره اذا كنتي بتعطيه من مضاد اقمنتين ..لانه ثقيل

اعطيه مره واحده في اليوم 1سم ..

واختاري اقمنتين المناسب للرضع .

اما لو بتعطيه من البيتاموكس فملئ القطاره كامله مرتين في اليوم

والترنح اما بسبب ارتفاع في حرارته او تعبه الشديد من الانفلونزا

قيسي حرارته بالترمومتر الالكتروني بفتحه الشرج او المسي اذنه من الداخل ..

كريسمي

24-09-2010 02:38 AM

رد: اصفرار باللون ..؟

الله يشفيه .. و ان شاء الله تكون الخبيرة ناديا افادتك

توهقنا

24-09-2010 07:06 PM

رد: اصفرار باللون ..؟

هذي صورة عيونه

http://www.2zoo.org/get-9-2010-2zoo_org_9wy5p3jx.png

وهنا اذاانه

http://www.2zoo.org/get-9-2010-2zoo_org_qobuiu5y.png

توهقنا

24-09-2010 11:26 PM

رد: اصفرار باللون ..؟

عطيته مضاد ..

واكلته دجاج مسلوق بس

لكن للحين فيه خمول .. وفيه حراره ..

هل ينفع التكميد البارد .. او الحار ..؟

الخبيرة ناديا

25-09-2010 02:37 AM

رد: اصفرار باللون ..؟

ايوه ينفع تكمديه بس بفوطه مبلوله بماء متوسط البروده ..

والافضل توديه بيطري يعطيه ابره تخفظ الحراره ..

انا ممكن اعطيك اسماء علاجات خافضه للحراره لاكن من الصيدليه البيطريه..هل هي متوفره عندكم ؟؟

توهقنا

25-09-2010 02:39 AM

رد: اصفرار باللون ..؟

فيه صيدليات بيطريه .. لكن كل ماكلمتهم قالو ماعندنا علاجات للقطط

الخبيرة ناديا

25-09-2010 02:47 AM

رد: اصفرار باللون ..؟

لان لو اقولك على خافض بشري ممكن يضره واغلبها سامه للقطط..الله يعين

فقط كمديه حتى تحسين جسمه ابرد من قبل ..والمضاد راح يجيب مفعول معاه لاتخافين..

توهقنا

25-09-2010 06:12 AM

رد: اصفرار باللون ..؟

ماتحسنت حالته للان ..

بالعكس كل ماله للأسوء

الحين صار يستفرغ اول شي قطع الدجاج وبعدين سائل اصفر بزبد...

امس ماتبرز ..الحين طلع بريحه كريهه جدا .. وعباره عن طبيعي واسهال بقطع الدجاج الي اكله مع بعض!!!

وطلع يمشي وطاح على طول بمكانه

اعطيه زبادي بالعسل.. ؟

اوقف الاكل نهائي .؟

وكيف اعطيه المضاد بهالحاله ..؟

توهقنا

25-09-2010 07:02 AM

رد: اصفرار باللون ..؟

تو قريت موضوع عن اعراض التسمم .. كلها تنطبق عليه ..

اتواقع انه المضاد الي عطيته السبب ..

يعني تسمم من العلاج .. بهالحاله كيف اتصرف ..؟

توهقنا

25-09-2010 07:07 AM

رد: اصفرار باللون ..؟

والحين بوله تحول للون البرتقالي :(:( :(

الخبيرة ناديا

25-09-2010 04:40 PM

رد: اصفرار باللون ..؟

ياقلبي المضاد مايتسمم منه القط..الا من جرعااات زائده ...وانتي مالك الا يوم واحد اعطيتيه من المضاد!!

قطك من قبل العلاج وهو تعبان وحالته سيئه..وسالتك على اعراض الكبد وجاوبتيني كلها لاء

لاكن الان الاعراض واضحه فيه وحتى لون البول تحول للبرتقالي وهو مرض الكبد

اسرعي للبيطري حتى يعطيه مغذيات بالجلد ..

ولو فيه تسمم مثل ماتقولين كان تلاحظين افراز شديد بلعابه وترنح وعدم القدره على الاكل .

اعراض قطك كلها مشابه لمرض الكبد ومشكلته علاجه صعب جدا ..

لابد مراجعتك للبيطري فورا

توهقنا

25-09-2010 05:34 PM

رد: اصفرار باللون ..؟

اقتباس:

المشاركة الأصلية كتبت بواسطة الخبيرة ناديا (المشاركة 1748154)

الا الحين مايقدر يتحرك ويدينه ترتجف .. كمدته بفوطه بارده على راسه

ويطلع منه لعاب وزبد .. ويستفرغ زبد برضه

وحدقه عينه واسعه بالمره ولا ياكل ولا يشرب نهائي .

راسلت طبيب وقالي اعطيه محلول dextrose 5% بالعضل او بالوريد 200 ملم باليوم على ثلاث مرات

الحين رحت الصيدليه البيطريه وجبت المحلول .. لكن بلشت كيف اعطيه اياه ؟؟

اجلس كل دقيقه اعطيه ابره ؟؟

او اعلق له المحلول طول اليوم !!

الخبيرة ناديا

25-09-2010 07:38 PM

رد: اصفرار باللون ..؟

ماينفع تعطيه ابر وانتي ماعندك اي خبره في كيفيه ظرب الابر..

ومحلول(دكستروز 5%) تحت الجلد يوميا او مرتين يوميا لتشجيع الجسم حتى يخرج السم من جسمه ..

يعني لابد من احد متمرس يعطيه ابره المحلول ..ويارب يقوم بالسلامه

توهقنا

26-09-2010 01:27 AM

رد: اصفرار باللون ..؟

اقتباس:

المشاركة الأصلية كتبت بواسطة الخبيرة ناديا (المشاركة 1748416)

الشكوى لله مافيه غيري يعطيه

والطريقه اني اشد الجلد وادخل الابره تحته

وحتى الان عطيته تقريبا 25 ملم / كل ساعتين 6 ملم

وفتامين ب مركب .. 1.5 ملم كل يومين

وحالته الحين مستقره .. ومافيه لعاب وزبد واستفراغ للحين

لكنه مايتحرك فيه الا راسه شي خفيف ..ويدينه ترتجف وتتحرك بشكل بسيط

وحرارته ترتفع واكمده بفوطه بارده وترجع تنخفض ..

اتمنى يموت الحين ولا يتعذب اكثر من كذا ..:(

اتنضر نصائحك..

توهقنا

26-09-2010 01:46 AM

رد: اصفرار باللون ..؟

الحين قام بالارتجاف وبحركه سريعه .. حستيه بيقوم ومايقدر

وطلع منه اسهال لونه برتقالي < لخبطه بين البراز والبول

توهقنا

26-09-2010 02:52 AM

رد: اصفرار باللون ..؟

برضو الحين قام يرتجف وياحول يقوم .. وقام بالتبول .. وكان لونه طبيعي

ان شاءالله انه يتحسن

توهقنا

26-09-2010 03:53 AM

رد: اصفرار باللون ..؟

والحين كرر حركته يحاول يقوم وكانه يبي يهرب .. ومايقدر بس يضرب بنفسه على الارض

توهقنا

26-09-2010 04:18 AM

رد: اصفرار باللون ..؟

هل هذي تسمى تشنجات ..؟او محاوله للنهوض .؟

توهقنا

26-09-2010 05:41 AM

رد: اصفرار باللون ..؟

الارتجاجات الي تصيبه .. قلت مدته ولكن تقارب الوقت بينهن

والحين اخر وحده مع اسهال برتقالي ..

توهقنا

26-09-2010 06:34 AM

رد: اصفرار باللون ..؟

طيب مافيه احد يعرف طبيب بيطري شاطر اكلمه واستشيره!!!!!!

توهقنا

26-09-2010 01:36 PM

رد: اصفرار باللون ..؟

خلاص ارتاح بسبس ومات اليوم الظهر

دلوعةقطوتي

26-09-2010 03:27 PM

رد: اصفرار باللون ..؟

الله يصبرك ويعووضك خير ماني عارفه وش اقولك

الخبيرة ناديا

26-09-2010 03:32 PM

رد: اصفرار باللون ..؟

لاحول ولاقوه الا بالله

الله يعوضك يارب ويصبر قلبك ..

اذكروا الله

26-09-2010 07:35 PM

رد: اصفرار باللون ..؟

الله يصبرك ويعووضك احسن واحلى منها
والله ضقت كثيــر لما ماتت !!

توهقنا

29-09-2010 03:41 AM

رد: اصفرار باللون ..؟

شاكره لكم جميعا ...

كنت ادعي ربي يرتاح .. اما يموت او يتعافى .. والحمدلله على كل حال

لكن الشعور بالذنب يكاد يقتلني ..

وللحين ابي اعرف وش السبب ..؟ ليه جاه المرض هذا !!!

هل هو بسبب تقصير مني .. او اعتداء .. او قضى وقدر ..اومكتوب له يموت بذاك اليوم .؟

دلوعةقطوتي

29-09-2010 04:30 AM

رد: اصفرار باللون ..؟

والله مالومك انا لما ماتت لوني حسيت بالذنب بس هو يومه وكله قضاء وقدر حتى لو مافيه شي وجاء يومه بيروح
ربي يصبرك ادري اللي فيك مو سهل وصعب تنسينه بس مابيدك شي تسوينه اللي صار صار
ادعي ربي يصبر قلبك وفقد الشي اللي نحبه ابدا موسهل وانتي سويتي اللي تقدرين عليه ماقصرتي معاه

جميع الأوقات بتوقيت GMT +3. الساعة الآن 04:03 AM.